Няръяна Ӈэрм
Хасуй вэбакоця’ ядэро’’ма
Ӈарка ям’ таб мара хасеръй’’. Лохомбадараха’’, сюрна’’ хамбда салабаӈэ ханимя’’. Тад нерня’ тецьдада сахама. Сэракако сыра тецьда няхаданда хаёвнзь пина, ханимы яна’’ хобам’ ӈобри’’ тондабида. Ӈарка сыра’ сэв’’ яв’ вархана вадёдана паю’’ пэдараком’ ӈули’’ тондада. Неру’’ малхана хаёвы хасуй вэбакоця нянда теберта’’ сыра’ сэвхат ныдабтасеты’’. Пэдарада сырам’ тоёмяць хонёдарха.
Время для чтения ~ 3 минуты
Тад ӈобӈгуна мале сыра’ еркана я’ ний мерця ӈарковна ладада. Танзеракода парондэй’’ нимня выварць сюра, паё’’ неру’’ ёльцянд’ тэвхая тодо яха’’ сюртемба пяда. Ябтако неро’ малхана, вадёдавы хасуй вэбацям’ пу’’лабтаварин’ харвада. Соходамда мэсь мерцякоцяда ӈани’ сахама, хасуй вэбацяр пересянда ныклы.
Нерде’ вадёдава яхаданда нуво’’ няку’ илада, тад тикахад сыра поӈгэйхана сюра ян’ ха’’мы’’. Пуданда выварта танзер’ мерцяко хасуй вэбацям’ ехэрана ян’ танада.
Парондэй’’ маси’’ нимня санартакораха. Пэдаракода хубтахана париде хаи. Харэ’’ помна санарць хэсеты, салтад’ нимня едейко пу’’ларёсеты, ӈани’ сыра’ ни’ ха’’амсеты’’.
Ниняханда тоса’’, хибяхав ядембада нямю’ малхана ня’’амвонда, таросяда ӈамгэӈэ таслахая, хэвня’ сабцьвонда. Пуда’ манэць нохо ӈэвы, ивнанда ядэрта Ӈэрм яна’’ сармик. Хасуй вэбацям’ писяӈэ пявэда. Выварта танзер’’ ӈани’ нерня’ пу’’ларада, Ӈо неру’’ варан’.
Ӈопой писавэй яля хубта ян’ хэвы, няхар’’ юд’ ня’ ватамбой километран’ пу’’ларавы’’. Хубтыхы ялэмдад’ пэвдякохона неру’’ вар’ парондэй’ ваӈган’ мантэй’’. Ныланана’ тотрев’ юседа, ниданда сыра’ таборако’’ пыдабтамбидо’.
Тамна пон’ юседаӈговакы, ӈобӈгуна хоркы’’ мандал’’ неру’’ варан’ ӈамдыд’’. Савак пыяха’’нато’ неру’’ мал ӈаворць пя’’, нидо’ нертемба тэри нявотарӈа’’. Ӈопой хоркы хасуй вэбакоцям’ тан’’ӈада, няби малмда ланзяртеда, хадахананда вэбакоцям’ тю’’у’ нэкалӈада. Хоркы’’ мандал’’ нерня’ сюрбыд’’, хасуй вэбаця хоркы’’ яд’’ма’’ поӈгана юседа хаи. Тадри’ ӈани’ мерцяӈэ хая, тарем’ мэнаханда Пяко’’ ӈэрм’ няюд мерцясавэй хадӈэ посада. Хасуй вэбацям’ ӈани’ сюртехэя мерця танада, тю’’у’ илсетыда, таси’ ха’’аврасетыда. Ӈани’ ӈоб’’ ту’’юку’ тихия, парондэй’ ваӈган’ ха’’мы’’. Таняна ӈани’ ӈамгэ’ пират’ юседа.
Ӈобӈгуна пэвдя пихина ӈэрм мерцяӈэ посада. Хасуй вэбацям’ парондэй’ ӈылад ӈани’ тюхулӈада, ихид мерець танзер’’ выврёсавэй’’ пэдара’ варан’ пу’’лабтада. Маймбададарев’ ямда манэць хасуй вэбаця ӈоб’’ пу’’лары. Неранда няна савовна теневана неронда тарка ӈадимя.
Ти, хасуй вэбацяр Ӈарка’’я явм’ сидя мадада, тарем’ ӈэдалёртанда, ӈани’ вадё’’мя неронда паханд’ пу’’ларэй’’.
Тикы’ нерцюна танзер’’ ханава’ нерня вэбакоця хасуй вунися ӈа’’, ӈавнахаванда илебей падяраха вэбакоця нисяв ӈа’’.
Автор: Никита Анагуричи’ падвы
Авторы
Няръяна Нгэрм
Темы