Хэбидя тум’ табцадавы’’

Москвахана «Россия» выставка тамна миӈа. Тандая’ таняна «Родные-Любимые» форум’ ёльцяӈгана хэбидя тум’ табцадамбавы’’. Мяд’ тер’’ ед’ таславы пом’ Россияна’’ ӈэвахана мэна ерв Владимир Путин нэвэда.

Время для чтения ~ 2 минуты

Ямалхад ӈэда’’ ӈани’ тикахана танявы’’. Юкад вата мяд’ тер’’ поӈгана Ямальской район’ терха’ Александр Худи няби Илона Окотэтто мэвэхэ’. Сидя иры’ тяхана ӈопой мяд’ терӈэ хаяхансь, тюнтавамди’ Россияна’’ ӈарка маркана мэ’’ӈадинзь. Пыди’ сидди’ мяд’’ тер’’ хэбидя тум’ табцадаванзь хамыць. Хасаваюм’ «Пламя» военно-патриотической клубхана манзара. Неюм’ Ямальской район’ ӈэвахы хардахана манзара. Александр лаханавы: «Мани’ сидни’ тэравадо’ ихинани сава. Хэбидя тум’ хар’’ни’ яхани’ тэвраӈгуми’. Ӈарка ненадо серӈэ тасламбими’. Ямалми’ саць мэнеми’, ява’’ сяхаринда нерняна мэсеты».

Хэбидя тум’ лимбя’ иры’ 24 яляхана Саляӈгардан’ тэврадись. Вячеслав Стышнов’ мяд’ терха’’ ми’’ӈадинзь. Пуна загсан’, Пётр’ няби Павел’ хэхэ’ мят’ ханавэдо’. Тикы’ пуд Тюмень’ няю’ ханда. Таняд ӈани’’ яха’’ ӈэдараӈгудо’. Хэбидя тум’ Москван’ Муром’ няд Свято-Троицкой хэхэ’ мякад тэвравыдо’.

Ямалхана 2024 пова’’ округна’’ ӈэвахана мэна ервана’’ Дмитрий Артюхов’ табековна Ӈацекы’’ поӈэ толы. Ямална’’ тер ненэцие тэри тарем’ таня’ нивыдо’ хай’’. Уральской федеральной округ’’ поӈгана ява’’ нерняна мэ. Яханана’’ мат’’ ёнаркад вата ӈацекы соявы. 2023 похона Ямалва’’ Россияна’’ ё’’ поӈгана тетимдей яхана мэвы. Теда’ 16 ёнар’’ ӈока ню вадабада мяд’ тер’’ округханана’’ иле’’. Е’’эмняндо’ хуркари’’ программа’’ таня’’.

Автор: Анна Яптик’ падвы

Фото: округна’’ пресс-служба тадтавы

Авторы

Няръяна Нгэрм

04:40, 31 января 2024

Темы