Няръяна Ӈэрм
Холговʼ ӈонʼ тэворӈаць
Округнаʼʼ этнокультурной центрхана манзаранаʼʼ нинаʼʼ Холговхад тоць. Этнографической экспедицияʼ серо тасламбадаʼʼ «Ядмаковна» нюбета проектʼ серʼ таняна юкад вата яляʼ ямбанʼ мэць. Культурахана мэнаʼʼ яхананаʼʼ тарця проектʼ серо мале ӈахакуд минрейдоʼ.
Время для чтения ~ 4 минуты
Тюку мэвахана теныʼʼ похоʼʼна Холговхана иленаʼʼ ненэцяʼʼ илаʼ саирʼʼ ханзерʼʼ мимамʼ манэʼʼсарӈаць. Таняʼ тэвормыʼʼ–учёной няваʼʼ Елена Пушкарёва, округнаʼʼ ЭКЦ манзаранаʼʼ — Ольга Латышева, ервандоʼ ӈудаʼ ӈылы — Людмила Ледкова, ненэциеʼʼ культура отделʼ ервота — Сергей Тайбарей ядэрӈаць.
Ӈэдалёрмидоʼ ӈэрмʼ терʼʼ центрхана маʼʼлюрмэхэʼʼ вадеʼʼядонзь. Бугриноʼ ӈэсыхына ӈохона теныʼʼ похоʼʼна иленаʼʼ иландоʼ нямна хонрабиць. Падартʼ падабидонзь, тадтаʼʼмаʼʼ, видеосъёмкаʼʼ сертабиць. Елена Пушкарёва мась:
- Холгов — саць мэбета ӈо ӈэвы. Маняʼʼ ӈока ӈамгэмʼ манэʼʼӈаваць, хибяриʼʼ иландоʼ нямна дневник падабиʼʼ, невхы паӈгодоʼ ӈобтʼ маʼʼламбиʼʼ. Ӈопой мякана хамадёда книгамʼ тадтаваць, 192 страницада, ненэцьʼ харта мята тер падвы.
Юʼʼ яляʼʼ ямбанʼ экспедиция манзарась. Ӈока манэʼʼмыдоʼ нертей ядабтавы — пысабцо. Холговхана иленаʼʼ хартоʼ вадавнандоʼ лаханаʼʼ.
- Маняʼʼ пивна ядэрцетываʼʼ, хибяринʼ лаханасетываʼʼ, хэтвыдоʼ падыбаванаʼʼ ёльцяӈгана, етриʼ хареʼʼ вадавнанаʼʼ лаханасетываʼʼ. Ихинанаʼʼ ёльце савась. Тикы саць тарана, — Ольга Латышева мась.
Иринатоʼ невхыʼʼ похоʼʼна мэʼʼмы ӈамгэри тамна мэʼʼядоʼ
Ӈохона иленаʼʼ невхы ембдяродоʼ, ты пэрмаʼ серкана мэʼʼмыʼʼ хамадяродоʼ лэтамбидоʼ. Ӈокханда 29 хибяримʼ лаханакурць няʼʼмыць. Юрʼʼ поʼʼ тяхана илевыʼʼ ненэциеʼʼ мэʼʼмыʼʼ ӈавори тедаʼ илениʼʼ мякана ховыць. Тарцямʼ 130 поʼʼ тяхана падвы книгахана нинаʼʼ манэʼʼмыць. Тикы нюдяко ӈодякохот падтавы сюдорʼʼ — не сава, тапочкаʼʼ…
- Ихинани тасламбасетыв, тапочка ненэцяʼʼ нисетыʼʼ мэсʼʼ, луцаʼʼ, ӈысмаʼʼ мэцетыдоʼ. Тадʼ Холговхана ненэциеʼʼ мятʼ тюӈгаванаʼʼ серʼ манэʼʼянаʼʼ, пысадамзь. Тарця тапочкаʼʼ 130 поʼʼ тяхана Тревор-Бетти падвы книгахана таняʼʼ, теныʼʼ поʼʼ ӈэсондʼ тэвавыдʼʼ, — Елена Пушкарёва вадеʼʼӈада.
Тревор-Бетти — Англияʼ тер, пыда 1894 похона сян ирийʼ ямбанʼ Холговхана мэвысь. Тамальӈгана тикы явʼ я, таняна иленаʼʼ илаʼ нямна ӈока ӈавэʼʼ маʼʼлавысь. Пыда падвы книгахаданда Европахана ӈэрмʼ я ӈохона илʼ танявамʼ намдавыць. Ӈохона и ӈока ненэцямʼ ховысь, пыдоʼ хартоʼ яханандоʼ иленаʼʼ ӈэвыць, ядоʼ ӈодʼʼ сэвхана мание паской ӈэвысь. Книгада «Во льдах и снегах» нюбеʼʼӈа. Тикахана ӈовна ӈэдалёрмида падыʼʼ. «Ядмаковна» проектвна манзаранаʼʼ этнографнаʼʼ книгамʼ нядʼʼмаӈэ мэʼʼӈадонзь.
Тюку яляʼ пиркана, Холговхана «Ӈэрм» нюбета КФХ таня, ненэцяʼʼ ханеʼʼ, халямʼ пэрӈаʼʼ. Бугринохона иланʼ ивъерʼ сыртаʼʼ, сахарамбада яндоʼ нямна ӈока сава вади мэʼʼӈаʼʼ. Пыдоʼ халядаʼʼ, ханеʼʼ, тудако, ӈоди маʼʼламбадаʼʼ, яханандоʼ вадёдананаʼʼ ӈамдэдо тырабтамбадаʼʼ. Яляʼ пэвсюмбыʼ ӈэсондʼ манзаядоʼ танясеты, — таремʼ экспедицияхана мэвыʼʼ нинаʼʼ лаханаʼʼ.
Проектвна манзаравыʼʼ ӈока ӈавэ маʼʼлаць, падаць. Нерняна сиддоʼ ӈарка, мэкад серʼʼ ӈате. Тюку поʼ маʼʼлавыдоʼ, 2026 похона «сборник»ӈэ ӈадимбатоʼ тараӈгуʼʼ.
Автор: Юлия Талееваʼ падвы
Авторы
Няръяна Нгэрм
Темы