Няръяна Ӈэрм
Хусувэдо’ таром’ ха’’аврамбавы
Ненэцие’’ поӈгана Ямальской район’ няд ӈэда’’ ненадоркаць, Сёяха’, Панаевск’ няд товэць. Пыдо’ ӈоб’’ хэвхана мядикудо’ ӈаць. Ӈамгэ’ то’’олха ӈавар пирембавамдо’ «Лэё» терхат хонравась. Тум’ маниенахана тороватам’, нюмда Хэвне ӈэвы:
Время для чтения ~ 4 минуты
— Нерня Сабетта’ няна мядо мяруванзь хаяваць. Таняна ӈобтикы хэбидя ялэдо’ мэ’’ӈаць, тюку по’ я’ индадм’ нэкалпади’’ компанияха’ ӈарка соя’’ма ялэди’ мэ’’ӈаха’. Маня’’ тальняю’ нэкалӈаваць. Нямэхэна иры’ тяхана мале тальня’ паднаваць, сидна’’ тюкон’ ня’’маць. Таремгав’ харкавана’’ яна’’ някуна пирдырман’ ӈани’ харваваць. Пуна ет’ таславы ӈэ’’нисяв’’, ӈадьбята март’ товаць. Тюкохона манэ’’манда ӈокарка, ехэрана ненэця’’ ӈод’’ торомдава и’ ватова. Хибя’’ хурка ӈавар’’ сертаби’’, ханзер’’ сертабидо’ саць манэ’’ман харвэйнаць. Сяхари’ сидто’ тотрев’ ӈаврадава’’ пиремба пиртава’’. Ябто’ евэйва’’, сэрабтавы халява’’, ӈодя’ тебт’ и’’ма’’, тырабтавы няньва’’, парадавы морана’’, ӈодина’’ таняӈгу’’. Я’ евэйм’ сертаӈгува’’, луца’ ӈаврасяӈгу, мал’ хар’’на’’ ӈаврарина’’ пядаӈгува’’. Сэрабтавы халява’’ хидя’ мю’ матортава’’, «лук»м’, «зелень»м’ тикан’ мэӈгува’’. Яни тер’’ ня’ тодамзь. Мал’ Вануйтава’’, тэнзарина’’ яӈга’’: Неро’’, Махако’’, Мыд’’. Хусувэна’’ нянда таславы манзаяда таня. Мани’ Алла Хосевна ня’ евэйми’ пирембини’. Гуля няби Хойне мякана халямди’ маторпихи’, тольмди’ хамэдамбихи’. Димава’’ хормда пятаби. Виктор Олегович няби Эдуард Тимофеевич машинам’ мэтахаюна’’, ӈамгэрина’’ тэвабадахаюна’’. Лариса Николаевна пэртада ӈани’ тянё ни ӈа’’. Пыда «жюри» това’ сер’ ӈаврана’’ нямна лаханаӈгу. Георгий тэри сидна’’ нядаванзь товэсь, пядва’’ пэпи, морам’ парадамби. Пыда Вануйта, тэнзада Сабы.
Сёяха’ няд товы’’ нито’ хэвхана мэна’’ Панаевск’ тер’’ ӈани’ варемдо’ мэ’’ӈаць. Пыдо’ тетдонзь, еркарадо’ — Сэротэтто. Ольга, Светлана, Владимир, тикахад мале ӈаркамбой хасава ӈацекы ёльце ва’’лёй’’ ӈэвэць. Тольндо’ ни’ хуркари ӈавудота ӈавар мэвэць. Есь’’мы халядо’, вэядо’, халя’ евэйдо’, мараӈгахад пиревы «компот»до’ ненэй евэйдо’, таняць. Едэйвана сертаба пявыдо’ «СеверРолл» нюбетыдо’ сямянхат саву’’ӈаць. Идюрцяхад сертавы’’ ӈэвэць. Ӈацекы’’ е’’эмня тарцяць: мараӈгам’, арбузм’, хэбт’ ӈодям’ ӈобт’ хулцу’’мэць. Ӈавыта саваӈэ ваде’’ӈадонзь. Ма’’нисям’’, понхарт’ тикыдо’ нивыдо’ мирдапю’’ (яӈга таславы мирцавэяць, енар’’ мирто’ яӈгусь). Мань ябцавы лескыдо’ хор’’ӈадамзь, ӈули’’ ӈавыдо’’мыць. Нимнандо’ пиревы мараӈгахана мэвыць.
Сёяха’ няби Панаевск’ тер’’ хэвхана сюрна’’ ненэця’’ ёльце ӈокаць. Мядикуто’ мю’ тюва’ то’’олхарт нись ӈа’’, нё’ сивна пан’’ӈась. Минхандо’ тольдо’ терсялворӈаць.
Пудана яляхана сямянхат ва’’лёйто’ нюбе хэтаць. Ямальской районхад товы’’ нина’’ ӈани’ ненадумда’’ми ня’’’маць. Сёяха’ няд тэвравы’’ морадо’ саварка’’ ӈэвы’’. Панаевск’ няна илена’’ нина’’ халясавэй «ролл» нюбета ненадумдавыць.
Сидя яля’ ямбан’ манэ’’мэва’’, намдвэва’’ ӈокась. Хусувэй ненэць’ харвабцом’ тасламбиць. Ханяӈына’’ ныхыдырӈаць, яркулаць, хано санарпиць, мальцята няби ной паныта, ненэй имбытата футболхана сянакуць. Ӈанина’’ хуркари’’ тохолковаха’’на мэць. Ӈацекы’’ яӈга сянако мядико’ мюня ма’’люрӈаць, падтаӈгуць. Мято’ хэваркахана ямб’’ толь’’ тяхана харто’ ӈудаха’’нато’ мивы’’, сэдвы’’ ӈамгэридо’ мирдапада’’ ӈамдыць. Сё мэта’’, тарана’’ мядоманзь товы’’ нидо’ майбтамбиць.
Автор: Анна Яптик’ падвы
Авторы
Няръяна Нгэрм
Темы