обновлено: 05:31, 22 июня 2023
Няръяна Ӈэрм
Ила’ саирм’ нерня’ минре
Грант’ еся’’ няд’’мяць Ензя’ тер’’ хуркари проект падыби’’, ӈадимдемби’’. Ӈока сертавэмдо’ «Норникель» компания’ минреда. Небой’ по’ ӈарка пэвдей ирыхына тасалкурӈаць, хибяндо’ падвы няхатата сава ӈэбта. Ӈокханда яна’’ тер’’ 13 тарана серм’ нерня’ ӈадимдевы’’.
Время для чтения ~ 3 минуты
Тикыдо’ ет’ ӈамгэри илека сер’’ нямна падвы’’. Ӈэрм’ тер’’ ненэця’’ ила’ саирм’ лэтрава’ нямна ӈэвыць. Евако ӈацекы’’ вадабада’’ мяд’ тер’’ проект ӈани’ ӈэдабтавыць. Таддикахад сёбар’’ ненэцие’’, ям’ сяма’ нямна ненэциена’’ няркана’’.
«Полюс Возрождения» номинацияхана «Ненецкий Новый год» нюбета нерня’ ха’’амвы’’. «Я’ вал» ансамбль’ нермбэртя Дмитрий Кошкарев нида няд’’мяць падвэда. Пыда тарця падар’’ ханзер’’ падыба таравахад тенева, нюртей манзаяда ни ӈа’’.
Сертавы манзаина’’ мале ӈока’’. Тюку по’, нара’ няна няхар’’ иры’ ямбан’ районна’’ хардавна ӈэдалёрӈаваць. Ӈарка ненэцяӈгат невхы вато, мэсы ма’’ламбиваць. Ӈамгэ ненадо ялэ ненэй ненэця’’ невхы’’ похо’’на ядабтамбавам’ хонрамбиваць. Нядандо’ мале ӈока ӈамгэм’ намдаваць. Тюкуна’’ хавна тамна мэкад серо ӈадимдеван’ харвава’’.
Дмитрий Кошкарев тарем’ лахана
Ма’’лавы лахарёход «Я’ вал» тер’’ «Ненэй ненэцие’’ едэй по» нюбета мэкад ӈамгэм’ сертаць. Ӈарка ненэцие’’ вадавна: хой’ тер’’, хаер’’ ӈадимя ирыхына таддикахад саво’ иры’ ёльцяӈгана едэй пом’ ядабтамби’’. Саво’’ иры’ нюртей яляхана ӈарка ялямдо’ мэ’’ӈаць. Яля’ ямбан’ ненэй мякана не’’ мядонди ядабтамбиць. «Я’ вал» ӈацекэхэ’’ нюртей «Ид’ ерв» ханзер’’ хаӈоро’’мам’ ваде’’ӈаць, ма’’нэлабтаць. Мядондаха’’на невхы сянакохо’’на сянакурӈаць. Ӈэрм’ тер’’ Ассоциация’ ня’, ӈока ню вадабада мяд’ тер’’ ядабтамбиць.
Проект’ ёльцьда тамна ни ӈа’’. «Я’ вал» манзаямдо’ тамна сертабидо’. Пыдо’ сюдбяко спектакльм’ ӈадимдеӈгу’’. Нюдя пэвдей иры’ ёльцьӈгана ненэцяӈг’’ сертавэмдо’ манэ’’лабтаӈгудо’.
Дмитрий Кошкарев илебей ненэй ӈацекы, Носко харад’ няна соявы. Ӈадьбята харе’’ невхы ирината ила’ саирм’ ӈоб’’ нерня’ минреван’ харвада. Ӈамгэри серм’ пяб’’нанда пили’’ техэ паӈгаханда тэврамбида.
Елена Ямкина’ падвы
