Иландо’ янамбовна хайна

Хусувэй по Си’’ив Харв мар’ ядхана тэсавэй ӈоб’’ ӈарка ӈэсы ӈадимзеты. Тикы Николай Егорович Лаптандер’ ӈэсы. Пыда «Салехардагро» предприятийхана ты пэртяӈэ тара. Сидто’ мале танякуй похона торомдадамзь. Мято’ ерв ня’ нина’’ талбэй сехэры’ ядхана хойнаць. Тэхэтата ӈобкана мяд’ няю’ товаць. Пухуцяда Устинья Николаевна сидни’ ядабтась.

Ёнре’’э’’ ямдава’ нерцюй хадырмамдо’ мэ’’ӈа’’. Сидяӈг: М.Яр’ тадтавы

Сяхаринда ӈобт’ тэворпана’’ лахарёва’’ ямб ӈэсеты. Вадава’’ ила’ нямна ӈась:

— Маня’’ мале пон луца’’ тэхэ’’на мэва’’. Тюку предприятийхана ӈокадо’ ӈысма’’ манзара’’, ненэй ненэцяӈэ маньрина’’. Нянана’’ харе’’ мя’’на’’ терри’’ мэ’’. Ӈэсыхынана’’ сидя ёнар’’ пир’’ тэва’’. Таркосавэй’’ харто’ яхана лэтамбина’’. Маӈгты’’ иры’ ёльцянд’ таняна мэӈгу’’.

Едэйвана соявы сую таминда ӈэта ни санэй’’. Сидяӈг: М.Яр’ тадтавы

Теда’ мале хар’’на’’ недармина’’ нюраку’’ӈава’’. Ӈысми’’ ӈэдалёва’ мюмня ненэй ненэць’ хэсь я’’маӈгуда. Пыдо’ ӈопой яривна ӈэдалы’’, ӈамгэри сехэрэда ӈэя пензя ваӈгӈэ хэя, сяхаӈгарт хэвнямна ни’’ ӈэдалёд’’, тикаримда нёдаӈгу’’. Тедари’ нерня’ нива’’ паромбаӈгу’’. Пэ’’ поӈгы ӈарханда сыра. Тамбир’’ варёда яӈгода. Ӈоб’’, сидя хаӈгана сую’’на’’ ӈадиберӈа’’. Теда’ тэводана ява’’ хубта. Тюкод хэ’’мяхадана’’ хуркари’’ ӈарка пэ’’ хоё’’ помна мюселтына’’. Воркута’ няю’ 410 ӈэдалаван’ тэваӈгунха. Пуна тикы сехэрэвнана’’ ӈани’ пырдари’ тутава’’. Та’ ненэцяӈг’’ нива’’ ӈэсур’’, харе’’ мэсетыва’’.

Ӈавка — сямянхат сава ня. Ниди’ вадаси’’ хамэдамбиди’. Сидяӈг: М.Яр’ тадтавы

Нюрте’’э пэ’’ помна мюсерць тоенась. Тедахав мале пирдалеваць. Ӈопой мюхуна ханона’’ нярма’’ таӈосеты’’. Ӈадьбяна’’ мюдхана сидя ханмана вадсетыва’’. Ӈока Ӈэӈта пэ’’ тяхаворта’’, хан тахара пир’’ӈада. Ӈадьбято’ хасава’’ мимбада ханодо’ саць мэё’’. Сехэрэна’’ ниня сидя халэта том’ хомбива’’. Туи’’, няӈэхэй’’ ватабасетыва’’ — тарем’ лахарёмда Николай Егорович маледась.

Сую’’ хадхана вэнеко’’ ӈани’ ханьта’’. Сидяӈг: М.Яр’ тадтавы

Ненэсяри тарем’ лаханакуртахана’’ пихиня тидӈэ хаясь, мяд’ ея лабна пэяць. Пи’ сеӈга хаиваць. Мале хона’’махадана’’ ӈамгэ’ пиркана малкодава’’ ӈадимясь. Пыда няби тыта ӈэвам’ манэсартанда луца’ вэн’’ тыда пявы’’. Теняӈы яля’ явохона соявы падвы су’’ляком’ сёйхатата сятормэдо’. Теда’ таняна мюсерта ненэцяӈганана’’ ервся’’ ядэрта’’ сюдбяко вэн’’ ӈани’ харто’ ӈарка маяӈэ хая’’. Тамна ӈарка ты хадаби’’.

Пихина хабэвко’’ мунли’’ со’’. Сидяӈг: М.Яр’ тадтавы

Марина Яр’ падвы

Сидяӈг: М.Яр’ тадтавы’’

Авторы

Няръяна Нгэрм

12:27, 15 мая 2023

обновлено: 13:04, 15 мая 2023

Темы