Няръяна Ӈэрм
Иландо’ нерняри’ миӈа
Теда’ яляна’’ сэв тю’’уна’ хан’’лы’’, ялява’’ ямбуворць пэй’’. Тюку по’ паӈохона ты пэртя’’ манзаядо’ саць ӈока. Неноховавна таӈгм’ по’ ямбан’ ни’’ хомбасето’. Тарем’ ӈод’’ тюку ирыдо’ ӈани’’ ирыхытато’ тоенарка.
Время для чтения ~ 4 минуты
Ненэця’’ нарэй мэлава’ яхато’ пясетыдо’, ялэхэ’’ мюсевари сер’’ ӈэсеты. Таддикахад варю’’ ирмня суюкоця’’ ӈадиберцеты’’. Нисерта яхадей, тикаха нюкцидо’ яӈга мание, лэтрамба тарасеты’’. Ӈарка ӈэсыхына мэна’’ хабте’’эдо’, яёл’’ тыдо’ тэрасетыдо’. Таркасавэйси’’ мюсесеты’’. Суюкоцидо’ хаця мэбер’’махадандо’ нерня’ танасетыдо’. Мюсева’ сер’ сояӈганако’’ хан’ ниня пэнёсеты’’. Яхадейм’ яркаӈгур, мюдханд сяраӈгур, нюнда турон’ харта ядаӈгу. Выдаӈганако танырта ханда ни’ пэнзетыда. Пуна нултава’ сер’ небяхато’ мицетыда. Ёльце по’ сава паӈо. Хусувэй ӈамгэ илелтана пэӈга. Едэй тэкоця’’ сояӈга’’. Янда ний варёхот ӈарханда падвэӈэ хан’’ӈа. Хадырта’’ тэхэрт’’ сававна ни’’ ӈадьсету’’. Выӈгы яхана иленанд тэванада яда хубта, пэдарахана иленанд тарця ни ӈа’’.
Тандая’ Надымской район’ нямна мюсерта ненэцяӈгад хонаркуваць. Евгений Окотэтто лакамбой’ хардан’ тэворӈась. Таняд вадам’ няна’’ ӈэдарась. Пыда ӈока’’ по’’ ямбан’ Наре харад’ хэвхана, пэдара’ поӈгана тыда лэтамби. Евгений тарем’ лахана:
— Мат’’ час’ пиркана тыни ма’’лэйнась. Пуна ватавы’’ халэни хардан’ ханаванзь ӈэдалэйваць. Халэни ханибтеӈгось’ мю’ сюрманзь тодамзь. Та’ хахая мэӈгува’’, ханюй халядана’’ хосаяӈгува’’. Нянани хасава нюми — Коля, тикаха Тамбей’ няд товы Ефим Окотэтто ядэрӈаха’. Ефим’ сыра’ ёльцянд’ нянана’’ мэӈгу, несэй илам’ манэта. Тедарихив’ нянанда тюкохона ёльце сава, ӈани яляхана манэтава’’ма хурка ӈэрись. Таддикахад тандая’ мипа пявы’’ ты’’ пардон’’ нямна хонаркованзь хардан’ товаць. Няни ма’’нисям’’, «ветаптечкам»‘ ня’’мава’ е’’эмня ты’’ пардонтавы’’ ӈэбто’ тара’’. Мань тыни яӈгавдавэй еремяць, ӈадьбята няни ӈамгэхэрм’ тедари’ ниць та’’. Ты’’ лекар’’ мякани то’’марихид тась пирта’’. Харвабта, та’ тутнакы’’.
Таняӈы яхана илена Евгений нара’ мюсевахад сабе ехэра. Мюсерць ямда ӈод’’ тянёӈэ ваде’’ӈа, тыяромбдарха. Хахая ӈэда’’ мяд’’ таня’’ма. Нядаӈгарад’ някуна мэна няхаюда Дмитрий няби Аркадий Вэллаха’. Теда’ пыдо’ мал’’ тыдо’ манзая’’ӈа’’, ӈани’’ серодо’ тасламби’’.
— Хусувэй яля’ яхадейни нисерӈа’’. Ӈокханда мале суюни сидя ю’’ пир’’ ватаӈэ харва’’. Ялэхэ’’ лэтё тара. Едэйвана соявы сую иӈгней’’, тамна ӈани’’ сармик’’ пясь пиръядо’. Ӈопой иӈгнейм’ мале манэ’’ӈадамзь. Вынхалуй нялоком’ ня’’амвысь. Ӈани’’ няхатата хаёвы, сехэры’ няю’ ваеравысь. Ты’’ни сарпявна пуня’ хаядамзь, мимани сер’ иӈгнейм’ манэ’’ӈадм’. Буранахана миӈадамзь, леберӈадамзь. Тэваданами нара’ сыра’ нимня ёльце мер’ хуны’’, нявота’’махартада нись ӈадю’’. Тарця ӈадиберта ӈули’’ та ни ӈа’’, яӈгом’ мяраӈгодакэдм’. Пэвдя тоб’’, ӈэрё’ няна ӈани’ ӈылекаӈэ мэтава’’, тына’’ хадабаӈгу. Тикы’ хавна нара’ някуна пихина мэна танясеты. Тедари’ сырада ёря, ваӈготанда хэвхана ни мы’’. Сарвэрмахаданда теневадм’, сельбя’ няна манэпивась, ханяна лыӈгарёвахаданда ехэрадм’.
Пэдара’ няна илена’’ няха’’тана’’ тарця юн намдаваць. Выӈгана мэна’’ суюто’ ӈокма нерцю’’ паромбари’ мюсе’’. Сырэй ханото’ сёсь ё тэвада’’.
Автор: Анна Яптик’ падвы
Авторы
Няръяна Нгэрм
Темы