Няръяна Ӈэрм
Индо’ харвабцовна нядаӈгурӈа’’
Нядаӈгардахана «СёстрыZAСВОих» нядаӈгоди’’ группа таня. Небой по’ ӈобт’ ма’’люрць пэйдаць. Сайнорта’’ яна’’ тер нядаба варемдо’ мэ’’ӈа’’. Нида нерня’ тидхалембадаӈэ Вера Павловна Эгамова тара.
Время для чтения ~ 4 минуты
Пыдо’ мале ӈахакуна ныланава’ яляханато’ ӈобт’ тэвормы’’. Ныхыто’ пирувна няд’’ми ма’’ламбавы’’. Тикыдо’ — ӈавар’’, еся’’, тамна ӈани няд’’мако’’ ӈэсетавы’’. Волонтерха’’ ханлавыдо’. Таняд таславы’’ ненэця’’ СВО’ няю ӈэдабтамбавыдо’.
Ӈобаӈгуна сава иӈудм’ ховы’’. Харто’ группадамдо’ сертавы’’. Нердена ялэдо’ тарем’ тензебтембидо’:
— Мал’ Нядаӈгарад’ терва’’. Нина’’ ӈока по’’ ямбан’ теневына’’. Помнана’’ мер’ юне ӈэдабтамбавана’’ е’’эмня интернет’ мутравна группам’ сертаваць. Тараванда мальӈгана таня’ паднасетыва’’. Нина’’ хонрамбасетыва’’: «Тюку яля’ сяха’ манзара пэӈгува’’? Хибя тута? Ӈамгэм’ сертабаӈгува’’?» Ханяӈы нина’’ хасава нюдо’ сайнорӈа’’, нито’ ню’’ СВО’ няна мэ’’, хибяхавадо’ таняна сайнорць яӈгумы. Ненадовна поӈга паӈгалпасетыва’’. Сямянхат ӈарка манзаядана’’ тасламбива’’. Сайнормахана ёльце таранаӈэ ваде’’ядо’. Хар’’на’’ «ӈувоцяха’’на» сяропина’’. Тарем’ нюмдебадина’’ — хэбицякована матормы тохоцяко’’. Сырэй нумгана мэ’’манда’’ поӈга’’ сэракорка’’ «ӈувоцяха’’на» сярсетына’’. Таӈы нумгана тараванда поӈгам’ падярахаӈэ сертасетыва’’, пя’ вэбараха, я’ сяр’ ний то’’олха ӈэбта серо’’ӈа. Тю’’уна тирта «дрон» поӈгахана синдавым’ вунида манэт’’. Мале мат’’ тарця поӈгам’ сярава’’. Тамна еся сава («шлем»)’ ни’ серыбада’’ таӈгакоци паӈгалпива’’, тикахад ӈобтикы тодо’’ тэнз’’ тохоцякохо’’на сярыбина’’. Блиндажхана хонё мэта’’ пыркабтадо’ ӈани’ сэдыбива’’. Мэць малевы’’ тохоця ма’’ламбива’’, тикыдо’ лекар’’ мякана мэтыдо’. Сэдора мэта’’ ӈаворина’’ хар’’на’’ тэмдабина’’. Ханяӈэхэна яна’’ терха’’ юнм’ ӈэдабтасетыва’’, нядандо’ тэмдорць есядава’’ ма’’ласетыва’’.
Вера Павловна нида ёльце саву’’яда:
— Мал’ харто’ индо’ харвабцовна нядаӈгодаӈэ тара’’. Волонтёр ӈэвадо’ падаркана пады. Хусувэй яля’ ма’’люрцетыва’’: няхар’’ часхад си’’ив час’ ёльцянд’ манзарасетыва’’. Хар’’на’’ помнана’’ пыхыдана’’ лярцакоцяӈэ нюмдебина’’. Мяканана’’ сертабадина’’ ӈани’ танясеты’’. Луиза Поронгуй нюнда нюм’ няць апельсин’’, яблок’’ ютекэци тырабтамбись. Любовь Филиппова «пастила»м’ сертабись. Ӈармы’’ нина’’ насак паӈгалпи’’. Ныхыто пирувна сайнорта’’ хасава нюто’ сенз ӈэвам’ лэтрамби’’. Теда’ ӈани’ несэй серм’ пяваць. Татьяна Пандо сидна’’ табедась. Пыда сайнорта мяӈгамда лахана ня’’мы. Таняд тарана вадам’ намдавы: «Тепловизорхат лыӈгарё мэта «плащ»до’ тянё». Ӈадьбяна’’ помнана’’ таслава’’: тарцядамдо’ хар’’на’’ сэдаӈгува’’. СВО’ няю’ ӈэдабтавана’’ нерцюна тяхасовна манэтына’’: ненэця’ ӈая’ явом’ пиня’ ӈэдарамбабато’ ни серос’’, тарем’ пэвдяхана тепловизорсавэй’’ дрон’’ сиддо’ ни’’ хоӈгу’’.
Минрена манзаямдо’ сайнорта’’ нито’ табекохо’’ инзеле пэрӈадо’:
— Маня’’ няхатана’’ етри’ хонаркосетыва’’. Ханяӈы’’ телефонувна лаханасеты’’, паднасеты’’. Тамна ӈани’’ отпускхана мэвандо’ мальӈгана штабхана’’ тюӈгасеты’’. Нядандо’ ненэйвана ӈамгэ таравам’ намдасетыва’’. Тандаярка ӈопой теневана нява’’ нянана’’ мядоӈась, таняна «Техник»ӈэ нюбе’’ӈадо’. Сидна’’ табедамбись, ма’’нисяв: «Ӈудаха’’на сяро’’мы’’ поӈгада’’ лыӈгӈэ мэць ӈули’’ сава’’. Тарця поӈгаха’’на синдавы’’ сайнорць мэта’’ ӈаворина’’, иле мядикуна’’ тю’’уд ни’’ ӈадю’’. Лыӈгарё хаюрӈава’’. Сайнорма’ серма’’ таӈгарка минрева’’. Ти, сидна’’ нядаба ёльце ӈарка таром’ минреда’’, тарем’ иле хаюрӈава’’».
Ваде’’мы нини’’ тотрев’ хусувэй ненэць’ нядаӈго пирӈада. Илесь яханата’’ Нядаӈгардахана мэна’’ не’’ тотрев’ манзарана’’ ӈани’ таня’’. Харваб’’нанда, ӈобтикы няндо’ хан’’ӈада’’. Тарця серкана няд’’ма сяхари’ тарасеты.
Автор: Галина Кинчина’ падвы
Авторы
Няръяна Нгэрм
Темы