Няръяна Ӈэрм
Ирина’’ мякана мядоӈаваць
Леонид Васильевич Лапцуй ирина’’ мядм’ мале пон’ сулорпидонзь. Мякнанди’ пухуцянда — Елена Григорьевна Сусой’ ня илеӈаханзь. Тюку по’ яра ирыхына сертадонзь. Ненэця’’ мядоманзь тэволыдаць.
Время для чтения ~ 2 минуты
Теда’ сидя илесь мядм’ ӈопой хардадрев’ сертавэдонзь. Няби лохохона сававна теневавы няда — Василий Тихонович Подшибякин илевысь. Пыда я’ тебтм’ пюртаӈэ манзаравысь.
Маня’’ «Няръяна Ӈэрм» газета’ терӈэ тандая’ таня’ ханӈаваць. Мюймда таӈгумдавэдонзь. Едэй мутратна ӈавэ сертавыць. Сидна’’ музейндо’ мюмня ядэлаць. Ӈавэто’ яӈга’’мам’ манэ’’лабтаць. Ирихиюна’’-хадахаюна’’ иле’’мям’ ваде’’ӈаць. Пыди’ ӈэрм’ тер’’ ила’ саир’ нямна паднавэхэ’. Сидти’ ханярина тенева’’. Падвыти’ сер’ ненэця’’, ӈацекы’’ ненэй вадавна толаӈгу’’. Невхы’’ иле, манзара, падна мэ’’мы лохоти’ мюмня ядэрӈаваць. Сямян мэ’’мы ӈамгэриди’ ӈахатандо’ сер’ лэтравыдонзь. Тарем’ иле’’мямди’ тасла пирӈава’’.
Илеванди’ ямбан’ нянди’ турмы ненэць’ ӈока. Ӈавнанди’ пыди’ ӈобтикы «Няръяна Ӈэрм» газетаханана’’ манзараӈаханзь. Та’ мальӈгы падвыди’ тамна толабина’’. Хусувэй падвэхэнанди’ хуркари’’ илаӈгана тарана’’ вато хось пирӈава’’.
Музеян’ мядоманзь турмы ненэй нем’ ядабтадамзь. Пыда тарем’ мась:
— Елена Григорьевна Сусой хадана’’ илева’ мальӈгана тюкон’ нянда турцетыва’’. Сидна’’ ӈули’’ сававна нюдрев’ ядабтасеты. Ваде’’мандада ӈока ӈэсеты. Ханяӈэхэна ӈамгэ намдаванда таняб’’, няданда хонрамбасетыва’’. Мята музейӈэ тарава ӈули’’ сава. Мяни тер’’ ня ӈоб’’ яля’ тэворӈаваць, ӈанисэяркавна сертавэдонзь. Хуркавна ӈод’’ ӈахатанда то’’олха. Хибяри’’ мядоманзь турць пирӈадо’. Вадёдана’’ ӈацекы’’ иринато’ манзарамам’, иле’’мям нидо’ юрыбаӈгу’’.
Сяхари’ тикы музеян’ ӈани’ тэвортава’’. Хуркари’’ мэкад’’ серо таняна сертабаӈгу’’. Хахаяда яля’ Леонид Васильевич Лапцуй иримдо’ тензебтемба «Лапцуевские чтения» нюбета яляхана падвы стихотворенияда ваде’’манзь ма’’люрта’’.
Автор: Руфина Окотэтто’ падвы
Авторы
Няръяна Нгэрм
Темы