Няръяна Ӈэрм
«Ялякоця» пирдырма ӈэвы
«Ялякоця» пирдырма ӈэвы
Саляӈгардахана няхаромдэй’’ мэва сёётэй’’ няби тарани’’ пирдырма ӈась. Ямална’’ ханярид юркад вата’’ ӈацекы’’ ма’’лыць. Пирдырмахана мэвы’’ си’’ив по’ пир’’ няби юкад вата сидндет по’ пир’’ мэць. Самляӈг номинациян’ тярпидонзь: невхы сё’’, невхы сё несэйвана серта’’ма, харе’’ падвы сё, тарава, мунота сянако мэ’’ма.
Время для чтения ~ 2 минуты
Ненэця’ вадавна хынотахав ет’ ӈокась. Сян вадам’ «Мараӈга»‘ группа тер’’ нямна мэтадм’. Ямальской районхад Ангелина Сэротэтто, Альбина Лаптандер, Римма Худи, Диана Лаптандер товыць. Пыдо’ мал’’ сёётэй’’, харто’ вадамдо’ теневана’’. Диана харе’’ падвы сёхона няби «Народный вокал» пир’’мы, нюртей ян’ ха’’амвы’’. Ангелинам’ ӈобтикы «Авторская песня» нерня’ тэвравэда. Римма ӈобтикы ва’’лёй ӈэвы. Тикы’ хавна невхы сё мэць нябимдей ян’ ха’’амвы’’. Альбина яӈга е’’эмнянда таславы ӈуда’ терм’ ня’’амвы. Сиддо’ тохоламбададо’, тидхалембададо’ — Ябтане Няруй.
Харта небянда падвы сё мэтам’, сидндетимдей классахана мэнам’ Худи Риммам’ лаханако ня’’ӈадамзь:
— Мань нябимдей мэва ӈарка сцена’ ниня нудм’. Ӈэрё’ Няръяна-Март’ хан’’ӈаваць. Таняна «Сава сё» ӈась, ӈобтикы хыно’’ӈаваць. Теда’ нюрте’’э’ сейми няркнана то’’олхась, вадини юра тосадамзь. Пунахав’ пыхыдами мэйравась, сававна хамадавась. Матдомдэй классахана хыноць пэйваць. Небями, хадами сё мэць теневаӈаха’, ӈадьбята хыно’’мам’ мэненакэв. Няданди’ хуркари невхы сё намдорцетыдм’. Мэта паныни, имбытадони небями сэдыбасетыда, ӈули’’ мел’’ не.
Яханана’’ илена’’ ӈацекына’’ ёльце ва’’лёй’’. Ненэся нерня’ мимандо’ е’’эмня сямян тарана ӈамгэм’ сертаби’’. Тид’’ нерня’ мимбато’, мэнена серто’ тяхари’ минребто’, хэвханандо’ мэна’’ сиддо’ етри’ тидхалембабто’, сяхари’ ӈар’’махадандо’ юнетаӈэ ханда’’. Сяни по’’ хэ’’мяхад, харвабта, концертхато’ хантанакэва’’.
«Ялякоця» пирдырман’ таром’ ха’’авравы ӈока. Ӈацекы тохоламбада’’, жюриӈэ таравы’’, конкурсм’ минрена’’, ӈацекы’’ небя’’ няби нися’’.
Автор: Анна Яптик’ падвы
Авторы
Няръяна Нгэрм
Темы