Няръяна Ӈэрм
Ямал’ яна’’ юнета паднана
Салехардахана «Наследие»м’ нюбета толаӈгулва хардахана ма’’лыць. Ненэця’’ Геннадий Алексеевич Пуйко’ — паднана’, падтаӈгурта’, ӈацекы тохоламбада’ ил’ нямна лахарём’ минрець. Вадам’ ӈабтамбадаӈэ таравы — юнета няна’’ не ню, Ирина Геннадьевна Окотэтто. Товы’’ няхата нисянда ил’, тидхалевы серота, падвыта, падтавыта нямна лаханась.
Время для чтения ~ 3 минуты
Геннадий Алексеевич Пуйко 1935 похона, нюдя пэвдей’ иры’ нюртей яляхана соявы. Нисяда ты пэртя ӈэвы. Мяканандо’ ӈацекэхэт ӈаркадо’ ӈэвы, тиканда нюдя ӈэдахаданда ӈарка нида нядабадаӈэ таравы. Хой’ няӈы’’ манзаи’’ тэнз’’ хусувэй харамдо’ теневавы. Сидндет похонанда Ӈыд хардахана тохолко пэвы’’. Си’’ив классм’ мале’’махаданда 1953 похона Ленинградхана ӈэда А.И. Герцен’ нювм’ нюбета институтхана тохолкова’ серо’’ няю’ хамекова’ курсахана тохолковы. Тарем’ школам’ мале’’махаданда Салехардахана ӈацекы тохоламбувандаӈэ тохолкурти’’ училищахана тохолко пэвы’’. Пуна Ӈыд’ няна ӈацекы тохоламбадаӈэ манзаралмы’’. Геннадий Алексеевич тикыта ирмня хуркари’’ серка’’на ненэцие’’ ил’ няю’ ӈарка таром’ ха’’аврамбавы. Ныдинской райкомхана комсомолхана мэвы. Ӈамгэ’ пиркана Яр-Сале’ хардахана школахана ненэй вадан’, падтаӈго ӈацекы тохоламбавы. Тиканда хавна клуб’ манзарани’’ серо тидхалембвы.
1966 похона Екатеринбургхана ненэй вадавна падвы «Нюдякоця нядаӈгода» книгада ялян’ ӈадимы. Ӈани няхатата ненадо падвэда — 1982 похона Леонид Васильевич’ ед’ падвы стихотворенияда «Енедат пуна». Геннадий Алексеевич падыбавыда хуркари’’ луци’’ газетаха’’на, журналха’’на ӈадибермы’’. Ханяӈы’’ «Няръяна Ӈэрм»хана тамна хомбина’’. Ханяӈы’’ падвы’’ стихотворенияда ненэця’’ сёӈэ ханабавыдо’. Сямянхат сёӈэ мэтидо’ нюбедо’ тарця’’: «Хамзанами», «Няби небяв»… Пыда ненэй вадан’ луца вадахад ӈани’ сё падабавы. Тикы’’ — «Яр-Сале», «Осень», тамна ӈани’’.
Толаӈгулва’ хардан’ хуркари’’ ненэця’’ товыць. Поӈганандо’ ирива’’ теневавы’’, юрёс’’ нида, манзара ня’’мыда таняць. Ӈобкана мэ’’мы иламдо’ тензибтембиць. Ненэйвана Анастасия Тимофеевна лахарём’ хаймламбидась. Геннадий Алексеевич вадёда ня’’мы няда ӈэвы, ӈопой я’ терха’. Хуркари’’ мэкад’’ иле’’мида ивхалӈась. Ненэйвана ӈацекы ӈэванда мальӈгана ханзер’’ сидта ӈапрамамда мэкадавна ваде’’ӈась.
Та’ мальӈгана ирива’’ хэвханана’’ мэнадарев’ няна’’ сыртархась. Ненэцие’’ минревы лахарё тэри инзелебцорись. Елена Николаевна Окотэтто няби Валентина Нёлёковна Няруй ӈобтикы невхы’’ иле’’миди’ ваде’’ӈаханзь. Пуйко вэсако’ хаир’’ — нюнда ню’ ню иринда падвы стихотворениям’ толась. Лахарёндо’ пуд ӈобт’ ма’’лёвы’’ ӈобнзер’’ «Тэталь Вэталь» сём’ ханаць, сёдо’ тэри хайнась.
Ирина Геннадьевна’ вадавна, тикы яля’ хэвхананда хахая нята’’ нида мэвы’’. Товы’’ ненэцие’’ поӈгана ӈокаюм’ пелядо’ нисямда теневавы’’, ӈадьбянда лахарёмдо’ сававна ӈабтамбавэдо’. Нисянда паднабцяӈгана падвыда тамна таня’’, тикыда ваднанда ӈобт’ ма’’ла тараӈгу’’. Сававна тидхалемахад ӈани’ едэй книгаӈэ ханданакы’’.
Автор: Алла Вануйто’ падвы
Авторы
Няръяна Нгэрм
Темы