обновлено: 05:22, 31 января 2025
Няръяна Ӈэрм
Ӈатенава’’
Тадри’ округна’’ тиӈгывна ты пэртина’’ сянакова’ яля’’ пэӈгуд’’. Маня’’ сяхаринда ёльце ӈатесетына’’, теда’ ӈод’’ ялэ ӈани’ толабина’’. Яра иры’ пудана яляхана нюртей сянакова Надым маркана ӈэӈгу. Тадӈо’’ Ямална’’ тиӈгывна ервона’’ мале ӈуда’ тер хамедамби’’.
Время для чтения ~ 2 минуты
Тюку по’ ехэрана мутры мипаӈгу’’. Тарем’ хаби’’ яхана Шурышкарской районхана Ханты-Мужи ӈэсыхына ӈэванда сянакова’ яляханандо’ нерня’ ха’’муванда ненэця’’ ӈуда’ терӈэ квадрокоптерм’ ня’’маӈгу’’. Тарця иӈудм’ Паюте’’э’ няна мюсерта’’ ты пэртя’’ округна’’ ерван’ ваде’’мыць. Тыдо’ ма’’ламба мэ’’эйдо’. Тю’’уд маниеб’’, ханя’ хэвадо’ сававна ӈади, тадӈо’’ варта тэхэна саваӈэ ваде’’ӈадо’. Приуральской районхана сямянхат ва’’лёй ненэцяндо’ ӈани’ тарця ӈуда’ терм’ ня’’маӈгу. Яханандо’ мале ӈахакуй похона мэць пявыдо’. Ненэся луца мутры саву’’мыдонзь.
Тазовский районхана мядонзэйдо’ яӈгаӈгу’’. Таняна сяхаринда мерета еся хано нерня’ ха’’амвы ненэцяӈгато’ мипасеты’’. Тюку по’ ӈод’’ ӈани’ тарця ӈэӈгу. Районханандо’ мале ю’’ «Буран»м’ тэмдаванзь пэрӈа’’. Теда’ ӈахакуд таславы яхат тэрабидо’. Тикыдо’ тодо нюдяко харда’’мна тяртыдо’. Яханандо’ Хальмер’’ Седехэна, Паютехэна, Ӈэдяӈгана сянакова’ ялэдо’ мэцеты’’.
Мале сян яля хэ’’мяхад нина’’ ядабтаванзь тодо я’’амна ӈэдалаӈгува’’. По’ тяхамбавы няхана’’ саць маямбаӈгува’’.
Марина Ярой’ падвы
