обновлено: 03:44, 25 августа 2023
Няръяна Ӈэрм
Ямдо’ тухуд лэтрамби’’
Няхар’’ си’’ив ялэ’’ ямбан’ епдя’’ нув’’ сидна’’ маядаць. Ямал’ тиӈгэвна я’ ний ӈарханда сэлӈась. Сада’’, сабол’’ мал’’ тыраць. Сарю’’ ӈули’’ пон’ яӈгуць, етри’ мерцяда иба’ няюд ӈась. Хэ’ сарё’ тир’’ хусувэй яля’ макабтыць, хэ’’ мунли’’ соць, тидпой’’ сарёӈэ ӈани’ нись ханас’’. Ям’ лэтрамбада’’ лаханаць: пэдаравна нёда’’ ядэр’’, тум’ нёда’’ пятабю’’.
Время для чтения ~ 3 минуты
Я’ паранава’ нямна ханярид юне намдорӈава’’. Яна’’ ерв’ табековна тум’ хабтабада ӈарка’’я тиртя ӈаном’ хамы’’. Надымской’ районувна тирмы, нядаӈговы. Ӈопой тирмахананда 12 тонна идм’ пэмбюрць, тэвра пир’’ӈа. Итамда Саля’ явхад сахалпи.
Тюку по’ паӈохона сямянхат ты пэртя’’ тыхына’’, писавэй-ялясавэй тэхэ’’нато’ мэ’’. Тев’ ёльцяӈгана мюсерта’’ манзаядо’ ӈока. Малкода’’ тыдо’ лэтамби’’, мэднидо’, тивак’’ хабцяӈгана хаӈгуртидо’ мание’’. Якэ’’ ӈабт’’ няндо’ ӈани’ тэворӈа’’. Ӈадьбята ӈули’’ тоса илесеты’’.
Ненадовна ӈарка мая’ Панаевск’ вынд’ тэвавы’’. Таняна лакри’ Хоркы’’ яха няби Яӈгута поӈгы я табцавы’’. Неняӈг’’ иры’ пуданахана ненэця’’ вадам’ ӈэдаравы’’. Харад’ тер’’, Ямалспахана манзарана’’ ӈопой ныхым’ мэць тум’ хабтабавы’’. Яна’’ тер’’ ёпдя’ ёльцяӈгана ямдо’ лэтрамба варемдо’ мэ’’ӈа’’.
Салпада яха’ няна илена’’ лаханавы’’:
«Тандер’’ я’’авлысь, нерде’ ӈамгэ паранавахад ехэраваць. Я ӈули’’ хахая табцавам’, пуна телефонувна намдава’’. Таминда тоса пэйна’’, мя’’на’’ хэвхым’ етри’ маниева’’».
Ямалспасхана мале ӈока’’ ненэй ненэця’’ манзара’’. Пыдо’ мал’’ выӈгана вадёвы’’, маларка’’ юнета’’ сёбар’’ илебей’’ ненэця’’. Ӈамгэхэв мая’ ӈадимб’’, сиддо’ нюртейӈэ ханзеты’’, тиртя ӈанохона округна’’ тиӈгэвна ядэрцеты’’. Тандая’ ӈобтарем’ парананам’ хабтаба варемдо’ мэ’’мы’’. Панаевск’ тер’’ ты пэртя’’ я’ ӈыламна минда тум’ таб’’ламба нядаӈговы’’, тыто’ хадырць ё лэтрамбавы’’.
Ямал’ ӈэвахана мэна ерв тарем’ лаханавы: «Ява’’ лэтрамбавана’’ няю’ ӈока есям’ ӈадимдеваць. Ямалспас’ тер’’ е’’эмня тарана ӈаво хусувэхэт тэмдабива’’. Табцавы тум’ минханда хабтаба тара. Тикахана лэёмбада ту ханяримна ни ханд’’, я няӈэдя ӈэӈгу’’нив. Небой по’ манзаява’’ сававна минреваць. Теда’ ӈани’ тарем’ мимб’’нанда серо’’ӈа».
Автор: Анна Яптик’ падвы
