Няръяна Ӈэрм
Яна’’ ты пэртя’’ сер’’
2024 по Нельмин’ Саляхана илена’’ хибяри’’ е’’эмня яӈга поӈэ толы, Выучейской’ нювм’ нюбета колхоз’ 95 пода ӈэӈгусь. ПНОК — округханана’’ нюртей ӈадимы ненэцие’’ оленеводческой кооператив. Иландо’ мэсыдм’ тасламбада’’, харто’ яндо’ историям’ теневана’’ Нельмин Саля’ тер’’ тикы пом’ сававна тенедо’.
Время для чтения ~ 4 минуты
Саляхана илена’’ ӈэсындо’ невхы ила’ сехэрым’ музейхана лэтамбада’’ архив’ падар’’мана, экспонат’’мана торомдамбидо’. Тарця ӈавори’’ теда’ яӈгода невхы иле’’мям’ лэтамби’’. Музей’ серо хамедамбавы’’ — Федосья Кауц, Анисья Апицына. Ты’’ниць ирий’ сидя юдимдей толыркана «Нюртей» нюбета спорткомплекс’ экспозиционной залхана ӈэсыхына илена’’ ма’’люрӈаць. Тикы яляхана 95 по’’ тяхана нюртей ӈадимы кооператив’ ед’ хамедавы выставкам’ нэць.
ПНОКхад округханана’’ колхоз’’ ӈадимдана’’ пядонзь. Тэвравы’’ экспонат’’ хуркари’’: тадта’’ма’’, удостоверения’’, грамота’’, награда’’. Тарцям’ маниесь ихинандо’ нисянато’, небянато’ илам’ тензебтембиць.
Невхы иле’’мяхад
1929 похона Тельвиска ӈэсыхына «Кочевник» кооператив’ базахана, РКП(б) директивам’ тасламбававна, нюдяко хозяйство ӈобня’ ма’’лаць. Тикахат ханзота коллективной объединение ӈадимясь, тарем’ ПНОК оленеводческой хозяйство манзара пэяць. Тарця серм’ тидхалемба юнета хибяри Иван Павлович Выучейской нядаӈгурӈась.
ПНОК’ нюртей председательӈэ Семён Андреевич Соболев хаясь. 1936 похона, Иван Павлович Выучейской’ яӈгумахад, ПНОКм’ несэйвана нюмдедонзь, Выучейской’ нювм’ нюбетаӈэ хаясь. Таня’ сян нюдямбой’’ колхоз ма’’лаць.
1937 похона Нельмин Саля’ ӈэсы ӈадимясь, И. П. Выучейской’ колхоз’ базаӈэ хаясь. Нельмин Нос’ соя’’ма’ яляӈэ — 1937 по’ ты’’ ниць ирий’ 13 толыр’’ толы.
Тамальӈгана Печора яха’ вархана ненэця’’ сян’ мядм’ мяраць. Нердена’’ харад’’ пуна мале ӈадимяць. Пыты, Арешная нюбета халядана’’ участокхат тэврэйдонзь. Ябцанава’, матлава’ харадм’, фельдшерской пунктм’ сертаць, школадо’ тамна яӈгусь, ӈацекы’’ тоходанаванзь Тобседан’ хан’’ӈаць.
Тамальӈгы похо’’на’’ нермбэртяӈэ падарм’ теневана’’ манзараць. Поӈганандо’ Степанида Петровна Апицына, Лука Александрович Тереревлёв мэ’’ӈаханзь. Тетеревлёв нермбэртяӈэ таравахана серодо’ ӈадя тю’’у’ хаяць, ӈули’’ мэйрыць. Сельской хозяйство’ выставкаха’’, ВДНХ’ няю’ ӈэдалёрць пядонзь, сававна манзаравандо’ ед грамота, медаль, знамя ня’’амсеты’’.
Нюдя’я’ тер’’ Выучейской’ колхозхана манзаравамдо’ саву’’ӈадонзь. Ӈармбэй хибяри’’ тев’ ёльцянд’ 60-80 похо’’на манзаравы’’ нермбэртидо’ тензебтемби’’. Ненадовна Степан Герасимович Ануфриев’, Илья Петрович Сметанин’ нямна лаханавы’’. Тамальӈгана манзаидо’ сававна минревы’’ тыбэртя’’, животновод’’ нюбедо’ пили’’ сосеты’’.
По’’ ваерась колхоз’ ныхыдамда ма’’лась, ӈэсыдо’ ӈарамданаць, ӈока ӈамгэм’ сертабиць… 90 по’’ ёльцянд’ маям’ ехэраць, тикы’ пуд колхоздо’ тахарась. Ханзер’’ илеӈгу’’? Тыбэрма серм’ теневана’’ ненэця’’ тыто’ хаё’’ми ма’’лась семейно-родовой община сертаць. Теда’ Нюдя яхана ты пэртя’’ ӈэто’ ни’’ нулъяд’’, тыто’ толыр’’ янамбовна ӈарамдана. Таняна харто’ ямдо’ мэнена’’ иле’’, паӈгодо’ лэтамбада’’ харто’ иламдо’ тасламбидо’. Тарем’ пили’’ ӈэя.
Автор: Юлия Талеева’ падвы
Авторы
Няръяна Нгэрм
Темы