Няръяна Ӈэрм
Ярабцада хайна
Тюку илаӈгана тарем’ таслаб’’, ярабц мэта’’ ӈоб’ яӈгода’’ то’’олха’’. Ӈыландо’ манэкаваб’’, ненэй хыноць ва’’лей Яр-Сале хардахана мэвы, нюмда — Вячеслав Хобкович Вануйто.
Время для чтения ~ 2 минуты
Мэ’’мы’’ сёхо’’та инзеленахани нюдя ӈэ’’мами тензебтедамзь. Ӈавна иринана’’ ӈани’ тарем’ хыноцеты’’. Та’ мальӈгана нито’ мяк’’ ӈэдалё ханцеты’’, сырэй ӈэбта сидя хабте’’эм’ подерта’’. Иры’ яляхана мяк’’ ӈэдалёсеты’’. Ханяӈэхэ’’на хан’ хансад’’ вырна’ сер’ индо’ ӈыл’ едэй сём’ тасламбаӈгу’’.
Вячеслав Хобкович тарця’’ вади хэтась:
— Ӈавнани ӈоб’ ярабц мэтаха’’ инзелесетыдм’, ханяӈэхэ’’на тэ’’элтаӈгосетыдм’. Тэ’’элтаӈгова сава, ярабц мэтанд вади иле’’мядрев’ маниеӈгуд. Ярабц харта невхы иле’’мя ӈы нив’. Нерде’ ярабц мэць ехэрадамзь, пуна ӈоб’ хэв ярабцадми ма’’ладм’. Тадри’ тухудм’, теда’ невхэхэд намдавы’’ ярабцани’’ конкурсха’’на мэцетын. «Лимбя» нюбета этностойбище’ мякана невхы намдавы’’ сёёни’’ мэцетыдм’. Теда’ мань «Душа Тундры» фестивалян’ хамекудм’, сёдми мале тасладамзь.
Вячеслав Хобкович ихинанда ёльце сава манзаям’ минре, пыда тарем’ тасламбида: «Ненэцие’’ фольклорм’ тю’’у’ миндя’’ ӈацекэхэ’’ ӈадимдембабана’’, тикахана ненэць’ ӈэвава’’ пун ӈэӈгу».
Автор: Мария Окотэтто’ падвы
Авторы
Няръяна Нгэрм
Темы