обновлено: 11:40, 13 декабря 2023
Няръяна Ӈэрм
Ярмарка ненэцие’’ ӈобт’ ма’’ла
Ленин’ нюмам’ мэта ядэлавахана нерни няд ӈоб’’ ӈэдалёда. Тет сэр’’ хабт сававна пяталмыд’’. Ханм’ мэта хавна тамна тет сюдбя ӈамды’’. Хэвувнани хэсь ненэця’’ письридо’ ӈамды’’. Маямби’’. Ханя, пыдо’ сяха’ Саляӈгарад’ помна тарем’ тэхэна ӈэдалёрта’’?
Время для чтения ~ 3 минуты
Хэвы нылынава’ яляхана округна’’ соя’’ма’ яляхана «Обдорская ярмарка» ӈась. Та ёльцяӈгана тодо яхат турта’’ мирдаӈгурта’’ ма’’люрцеты’’. Теда’ мэва ядэлава’ ниня сидя хэвувна хардако’ мюня ненэця’’ нуць. Мань ненэй ненэцяӈэ лаханако нядми пюнахани, Пётр Николаевич Худя’ ядувна ӈадимядм’. Си’’ми манэць нями хардаконда мюд ӈадимя.
— Хурка тэмдорта таня? Тэри ирмнянда ядэрӈа?
— Тюку маня’’ ялява’’ вуни ӈа’’. Ӈадьбята сабе тэмдорта яӈгу. Сянакова’ яляхана ӈока ненэцями ӈэсеты. Теда’ тэри манэ’’саръядо’, хонрамбидо’. Ненэй ненэць’’ нини’’ хэвхани нулаӈга’’, пыдо’ ваде’’мандадо’ ӈока, тикы ӈани’ сава. — Пётр Николаевич манма.
Тамна тяха’ пяв, толь’ тяхана панытана не’’ ну’’. Тюков сидя не Тайберихи’, та’ ямбан’ сэдабавы буркыди’ мирдапавэхэ’. Сэр’’ хобахат сэдвы ӈэ’ харнак’’ сыра’ ниня ни’’ ӈадю’’. Юдмян бурка нито’ ядан’ ӈухукодрев’ нултавыди’. Нумда тецьхамзь ненэця’’ ӈэдо’ ханибертакы’’. Нянди’ нултаӈгана’’ ӈокамбой’’. Лахарём’ мэць ханзода яӈгу, ет’ хибяри’’ нултаӈга’’. Хэвхананди’ мэна няди’ Елена Худи ӈобтикы тэхэна мэна ненэцяӈгана тарана ӈавэ мирдапи. Пива, тобак вынд’ ӈэдалаван’ харвана тикад тэмда’’махаданда тэри сераӈгуда. Ӈэдалёрпата ӈамгэхэрт тецьда сидта ни таблаӈгу’’. Паӈгалмы ни сэв’’ хаюядо’, тэри сярва пир’’ ӈэвы’’. Харта яхананда Воркута’ нямна мюсерта не Лаптэй не нюнда ня’ ты’’ ӈамзи мирдапихи’. Ӈэ’ лы’’, нелак’’, сей’’, тэри толянди’ ниня ӈоны’’. Небяюм’ ма’’нив: «Харад’ терха’’на ӈамзан’ харвана’’ ӈока’’. Луца’’ лы харвобта’’, пыдо’ тикахат ӈавыдота’’ ӈавар сертаби’’. Тэвравыни’ мал’ мирдайни’. Маня’’ нянана’’ тарця сянакова’ яля ӈули’’ сава. Есядава’’ нэкалпива’’».
Ӈоб’’ ӈарка мяд’ ядан’ нулаӈгана мале ӈока. Ханяӈыдо’ тюӈгасеты’’, ӈанидо’ пин’ тарпорӈа’’. Тикы’’ хэвхана пэдари’’ поӈгана хынота’’, тарана’’ нито’ ирмня нерня’ сыӈторӈа’’. Сянакода’’ сянаку’’, санарта’’ санарӈа’’.
Тадӈо’’ ханя тарця ӈа’’, пихиня нумда ибась, ядэрта’’ таӈга таранадамдо’ тэрабиць. Халяр халя, ӈамзар ӈамза, ӈодь сепанд мюня есяр таняя. Мал’ хоӈгуд, нянанд ханаӈгуд. Тарця «Обдорская ярмарка» Саляхардахана ӈась.
Автор: Марина Яр’ падвы
