Няръяна Ӈэрм
Юмборад’’ сидна’’ ӈате’’
Вадёвамдо’ пон’ ӈатеваць. Небо’ мараӈгава’’ Салехард’ няна нись вадю’’, ненэця’’ тэри ӈоб’’, сидя хомбиць. Тюку похов’’ лабта’ юмборад’’ тэри няръя’’, яля’ ед’ ябере’’. Тадхав’’ манзаяна’’ пуд вынд’ нина’’ нертемба пяӈгува’’.
Время для чтения ~ 3 минуты
Ихиня мараӈга’’ ӈэрм’ терха’’на сямянхат харвобтана ӈодя, ӈадьбята хусувэй по’’ ӈатесетыдо’. Маня’’ ненэй ненэцяӈэ мараӈгымана’’ нямна хуркари’’ ва’’ал’’ таня’’, тикыд сидна’’ табедамби’’, тохоламби’’. Пили’’ нюрте’’э’ хойхана небянана’’ сидна’’ пэвсюмя’ няна ӈодиманзь ни’’ ӈэдарамбасету’’. Манзеты’’: «Талереӈгуда’’!» Тарця вадам’ намд’’махадана’’ ӈодь’’ тидӈэ хэ’’мяхаданда таминда мядона’’ няю’ пясетыва’’.
Тюкоми падвани нерня манзара нята нини’’ малкова’ нямна хонрамбидамзь. Анна Яптик тарця ӈавэ’’ няни ваде’’ӈась:
— Малкурма’ ёльцяӈгана нерде ма’’лавы мараӈгыд тэри лахаця’ ниня хаеӈгуд, тарем’ ниб’’нанд серта’’ неранд няна ӈамгэхэртм’ нин едтеӈгу’’. Тикада хаӈор’’ӈэ тара. Сяхаӈгарт’ няхар’’, тет сэвтана нива’’ ма’’ламбасету’’. Ӈока мараӈгасавэй ям’ хоб’’, хэвняку хэсь таслаб’’нанд, ӈодясавэй ямд ненадумда серо’’ӈа, тарем’ ниб’’нанд мы’’ пырдари’’ тоб’’нанд ямд ётар. Ӈокам’ ма’’лабнанд едамд ӈамгэ’ пират хае таслаб’’нанд нимнянда я’ няӈгадм’, пякоцям’ мэбат тара, ни тянюмд’’. Ханяӈы’’ ненэця’’ тамна ям’, ӈодям’ юркана масарпидо’, ӈани’’ неро’’ маликаха’’ няръяна ной сярыби’’. Сяхаринда малкова’ мальӈгана тоса серо’’ӈа, я’ сармик’’ нимня ӈадимаӈгаданд хэвнякумна сыртан, нит таняб’’, ханяна мэ’’вамдо’ ваде’’паӈгун. Вэ’ хэва’ ёльцяӈгана ӈани’ мараӈгынзь вэва. Сямянхат ӈавыдота’’ ӈодя’’ пырдари’’ мят’ няю’ хэсь тасла’’махаданд хомбада’’. Тикада ӈока манэ’’мы.
Тёняӈы хаби’’ тэнз мэта’’ нини’’ ӈобтикы лаханако няйнась. Пэ’’ няна вадёвы Вера Лонгортова лаханась. Ма’’нисяв, мараӈгыма’ ёльцяӈгана малко пэвана’’ нерня толь’ ни’ ӈавар’’ мэсетыва’’. Маня’’ тикаривна нива’’ ӈамдасету’’, ӈатенасетыва’’. Пуна ниня ӈадьда’’ нина’’ ӈаворо’’махад тандая’ ӈамдасетыва’’, ӈаворцетыва’’. Ӈани’ ӈамгэ ӈарка няхата’’ни хамедавэми яӈгу.
Ти, тарця ӈавэ’’ няхата’’ни намдадамзь. Пыдара’’, маси’’, ӈани’ теневанида’’ танянакы’’, няна’’ ваде’’яда’’, падыбида’’. Мараӈгымб’’нанда’’ тосада’’, неранда’’ няӈы ӈодимбата’’ няръяна нойдарев’’ няръяна ӈэя.
Автор: М.Ярой’ падвы
Авторы
Няръяна Нгэрм
Темы