Няръяна Ӈэрм
Юр’’ помдо’ ядабта’’
Саляӈгардахана округна’’ тер’’ ненэцие’’ ила’ саир’’ харад — «ОЦНК» юр’’ поданда хаясь. Таӈок по’’ ямбан’ нюмда, мэлвамда ханзели’’ яӈгамдамбавэдо’. Нюрте’’э’ «Дом нацмена» нюбе’’мы. Тикы’ пуд «Дом туземца», «Дом ненца» ненэй ненэця’ харадм’ ӈэрм’ тер’’ ила’ саир’’ мяӈэ «Дом культуры народов Севера» нюмдевэдо’. 1990 похона округна’’ тер’’ ненэцие’’ ила’ саир’’ харадм’ нюбе’’лавы.
Время для чтения ~ 3 минуты
Ӈоб’’ яля’ ӈавхы’’ сеётэй’’, тарани’’ нюртей хардандо’ хурка ӈэ’’мям’ манэ’’лабтамбиць. Тикахана мэвы ненэй нем’ лаханако ня’’ӈадамзь. Пыда тарем’ ваде’’ӈадась:
— Невхы похона тюкохона манзаравы’’ ненэцие’’ ила’ нямна ӈэвы вададо’ ихиня сава то’’олха. Ӈока сёётэй’’, тарана’’ ненэця’’ тохолковы’’. ОЦНК тамна пон’ таняя, савумданая. Тандая’ хыноць тохолкода’’ пили’’ тоходаная’’.
Ныланава’ яляхана ОЦНК’ соя’’ма’ по’ ед’ концерт ӈась. Мяни тер’’ ня сырманзь товаць. Тарана’’, сёётэй’’ ненэця’’ нерна’’ няд ӈадиберӈаць. Тикахана лохо панӈась. Пуна’ ембатавана’’ сер’ ӈопой ненэй нем’ ядабтадамзь. Няданда тарця’’ вади намдадамзь:
— Мань нюмами Ольга Ильинична, еркарами Тайбери. Аксарка хардахад товаць. Тэри таремӈгав’ выӈгана иледм’. Нянани сёётани, тарани маниеб’’ ӈули’’ савась. Ембдяродо’ паскояць. Сёдо’ тэри хайнаць. Теда’ ОЦНК’ юр’’ поданда хая, тикар ӈока. Тохолковани’ мальӈгэхэд тенев. Падаркана тадтавы сидяӈгахана манэ’’пасетыв. Тамна ӈули’’ техэмда ехэрав. Ӈавна хасава мяӈгами, Ӈаркамбо Николаевич Лаптандер, округна’’ ила’ саир’’ мякана хынотаӈэ тарась. Пухуцяда «Сыра’ Сэв»хана тарась. 1980-й похо’’на Москва’, тамна ӈани’’ марад’’ нямна ядэрцеты’’. Пыда ёльце сававна хыноцеты. Сёда тамна тенейн. Та’ маляӈгана ӈацекэдамзь, Саляӈгардан’ нисетыдм’ тэвор’’. Белоярск хардахана школахана тохолкудамзь. Хыно’’мамда ӈацекы нини’’ ня телевизоркана манэ’’цетыва’’. Вынд’ мядо’’манзь та’ ханяӈэхэ’’на тэворцеты. Теда’ си’’ми мара’’ ядабтананё’’, невхы иле’’мини’’ тензебтедм’. Тюкохона манзарана’’ сенз’’ ӈэя’’. Тамна ӈани мэкад манэ’’манда ӈамгэхэ’’на, концертаха’’на сидна’’ маябтамбая’’.
Ненэцие’’ ила’ саир’ хардахана манзарана’’ саць тарана серт’ пон’ хамекуць. Тикы’ ед’ ӈэда’’ ялэдо’ сававна сертавыдо’. Мядондито’ е’’эмня таславыдо’ малеяд’’. Тад пуна хуркари’’ концертадо’ ӈани’’ яляха’’на таняӈгу’’.
Руфина Окотэтто’ падвы
Авторы
Няръяна Нгэрм
Темы