Няръяна Ӈэрм
Каԓитанан дяԓян ӈомаш’’
Дёԓеԓьш чепьмантуӈ неԓьня хомана ныптаку’’. Чуки диԓихиты Пюԓ дяхана ӈайта каԓтыхина’’ каԓитани’’ дяԓям мээԓӈа’’. Неԓьчеэй мансдянтуӈ дет тонԓюта дяԓямтоӈ Ханымей’ няна каԓиташ мансԓанна’’ мэӈатоньш. Чикиӈ пут Каԓпюԓкана диԓина’’ каԓитанаӈ дяԓян ӈомаш’’. Поӈкнатуӈ шана’ко мянаԓяш’’, вильта концерт’ маныдеш ныптакуш’’.
Время для чтения ~ 4 минуты
Ненэй мяту’’ меӈаш’’, неԓьшут мячинчетуӈ ӈамԓат пиԓиӈаш’’. Каԓпюԓкана диԓина’’ меԓ дюԓкикат праздникхантоӈ ӈанатайташ’’. Каԓитана’’ нешади’’ поздравийманта мэты Каԓпюԓан Пуровский’ район’ веԓв Кирилл Трапезников тоӈаш. Кирилл Михайлович куԓкаԓи’’ хома вачи’’, мансдянтуӈ де’эмня ӈайта’’, праздникан томы’’ нешаӈки’’ мэӈаш. Куптаӈ каԓита мансԓана, выӈкай дилмта чиԓьниймана минԓена пушам поздравийӈаш. Лилия Кантлевна Агичева благодарственный’ патаԓ Ӈэԓм’ чеԓ’’ нешади’’ дет ӈайта департаментхат няамӈаш. Каԓпюԓ администрацихина мансԓанахаӈ Елена Алагулова, Екатерина Киселёва Пюԓ дяна веԓвхат почëтная грамоти’’ няамӈаханьш. Чет’дяӈкня пота каймы Данил Айваседо неԓьчеэй патаԓта ‒паспорта Пюԓ дяна веԓв ӈутахат няамӈаш.
Чикиӈ камна праздникан томы’’ нешади’’ поздравийпёши Каԓпюԓ администрациӈ мансдям минԓена Татьяна Енксевна Дмитриева мунуӈаш, «С/Х община Пуровская» тэта Михаил Быстров. Пы’чи ӈупчики каԓита’’ мансԓанна’’ нешаӈк куԓкаԓи’’ лимьпча вачи’’ мэӈаханьш. Чикиӈ пут праздникан томы’’ неша’’ поӈкнатуӈ мянаԓяш’’. Неԓьчеэй вальӈанохана дяхаӈ кысумна ԓапяташ мянаԓяш. Таԓьша ӈанум мэш дëԓиԓта’’ неша’’ тамна нючаӈэ тохошту’’. Таньше шана’ко мянаԓьш ӈайвахай местам’ Сергей Агичев канаӈаташ, нимимты местан Василий Пяк каамдяш, няхамтэн — Борис Агичев.
Чикиӈ камна касама’’ нюӈк ӈаймямтуӈ, нэхэмтуӈ конуԓпёш шана’ко чепиԓяш’’. Нэхэԓумпиш’’, няхаԓ ха’’мхана ха’’муԓяш’’. Пиԓи нэхэтаӈэ Григорий Пяк тонԓаӈа’’, пы’та ӈайвахай местан ка’’май, нимимты местам’ Евгений Пяк канаӈаташ, няхамты местан Роман Пяк каамдяш. Няхаԓ ха’’мхана ха’’моԓьш ӈайвахай местам’ Руслан Пяк канаӈаташ, нимимты местан — Илья Пяк каамдяш, няхамтэн — Владислав Айваседо. Касами’’ мятаԓтаны’’ неӈи’’ ӈупчики поӈкнатуӈ мянаԓяш’’. Кукитуӈ меԓ, пиԓи меԓьмана каԓям пcхcмам ӈычимчимпиш’’. Таньше мянаԓьш нята неԓьня пcхcмта Татьяна Пяк пcхcӈаташ, нимимты местан Фаина Пяк каамдяш, няхамты местам’ Галина Пяк канаӈаташ. Нешади’’ хыниԓмаӈ мэты ДК «Снежный» клубхана мансԓанна’’ тохоԓампючетуӈ ӈашки’’ няш вильта концертный’ программам’ шеԓтаӈаш’’. Кынуӈаш’’, таԓаӈаш’’, театрализованный’ постановкам’ ӈычимчеӈаш’’.
Чикиӈ камна ӈашкиуди’’ шана’комаӈ мэты Каԓпюԓкай библиотекахана мансԓана нямтуӈ няш куԓкаԓи’’ вильта’’ конкурсу’’, шана’ку’’ шеԓтаӈаш’’. Чики дяԓяхана ӈашкиуди’’ майпёш поӈкнатуӈ хомана шана᾿куш’’, мянаԓяш’’. Мянсдянтуӈ дет ӈайта дяԓяханантоӈ каԓитана’’ нешади’’ мятчеԓ’’ дëԓьше хомана ныптакуш. Каԓитама -шеэмна мансдя, выӈкна диԓе тохомы’’ нешинԓи’’ чики ӈайватам пиԓӈатуӈ. Пу’’тахана каԓитана’’ таӈичохона мыԓичуӈ дёԓьшат дёԓеԓьшту’’, шанат тонна’’ каԓи’’ планыхинтуӈ мишту’’. Четаӈ манԓе таӈичохой путинам’ наймяхатоӈ неша’’ каԓиташ чепьӈа’’. Пюԓ дяхана мэна’’ каԓитана’’ ӈокна Пуровская общинахана мансԓаӈа’’.
Чуки похона катаваньчитуӈ каԓитуӈ план’ ӈука. Выӈкна диԓина’’ нешаӈкна таԓьша ныптакома дяԓя таԓа, четаӈ нум’ таӈичумахаты шан нешаӈи’’ ӈудютоӈ дякуты. Таӈичохона путинаӈ чепьмахаты мансдетоӈ ӈука’’ ӈcшту’’. Праздниктуӈ хитамахаты шана’кош мянаԓьш нэхэԓмы’’, ӈайвахай местам’ канамы’’ тотуӈ мячисы’’ няамӈаш’’.
Автор: Андрей Пяк патмы
Авторы
Няръяна Нгэрм
Темы