обновлено: 11:56, 29 июня 2023
Няръяна Ӈэрм
Каԓиташ чепьӈа’’
Пюԓ дяхана диԓина’’ Ӈеԓм чеԓ’’ неша’’ каԓиташ мансԓе чепьӈа’’. Чуки похона каԓитана’’ ӈука каԓи’’ катаваньш мэӈа’’. Пуровский агропромхана шеcв сельхозпредприятии’’, чикехена ӈопшеԓы няхаԓ дюԓ’’кат ва’та хампԓяӈк’дю’’ неша’’ каԓитаӈа’’. Непоӈ совхозхана’’, общинаха’’ мансԓанна’’ каԓитуӈ планым’ чупей’’ чемнанта коӈатоньш. Каԓиташ мансԓанна’’ ӈопшеԓы ӈуп дёнаԓ’’кат ва’та чет’ дюԓ шича дю’’ чет’ тонна’’ каԓи’’ катаӈаш’’.
Время для чтения ~ 2 минуты
Чуки похона каԓитана’’ ӈопшеԓы дёнаԓ’’кат вата хампԓяӈк дюԓ’’ тонна’’ каԓям няамваньш мэӈа’’, чуки похой планатоӈ таӈок. Совхозхана’’, общинахана’’ мансԓанна’’ каԓитамаӈ дет ӈайта ӈайвачетоӈ дёԓеԓьш чепьмантуӈ неԓьшуна шеԓтадятоньш. Каԓитана’’ бригада’’ манԓе дёԓеԓьш мээвчетуӈ поӈктуӈ, нямсахайтуӈ хынԓуԓяш, дяшитуӈ дёӈаш’’. Дячапёта нумкна каԓитана’’ неша’’ катамайтуӈ каԓитоӈ чики минхантуӈ факторихи’’, плавбазаха’’ тэйваштутуӈ. Таньняна мансԓанна’’ таӈичохона дяԓи’’тахана нешади’’ каԓе’’ нямаԓпёштутуӈ. Каԓитоӈ вомантуӈ тайхана чики минхантуӈ холодильник’хи хинташтутуӈ. Шаӈкмян предприятии’’ таԓьштоӈ тадя’’.
Ӈаԓка дямкна каԓитана’’ четаӈ манԓе плавбазасамы’’ ту’ӈану’’дётоӈ деԓинԓама дяхатуӈ тэвԓайтуӈ. Таӈичуӈ дямпхана каԓи’’ нямаԓпёта’’ ту’’ӈано’’ таньняна нунӈа’’. Таԓьша ӈано’’ ӈаԓка нялпэй вит’ манԓе конуԓмы’’, куԓкаԓи’’ ха’та’’ кампахана’’ миньшту’’. Каԓпюԓ няна каԓитана’’ неша’’ каԓитоӈ Каԓнаткан таштутуӈ. Куки неша’’ хыԓаӈ ка’аммаӈ дёԓьшат каԓитанӈа’’. Неша’’ маньшту’’, ԓакхай по’’хоты каԓя’’ чидюма’’. То’’, дяха’’ каԓяшаԓма’’. Планамтуӈ тэвмантуӈ мэт неша’’ дяԓитахана мансԓашту’’.
Каԓитама — ха’та, шеэмна мансдя. Выӈкай мансдян, ненэй дилант тохомы’’ нешинԓи’’ таньше писамэй мансԓаш пиԓӈштутуӈ. Каԓитана мансдята таԓьша — ӈука каԓям катанаӈа, чикехена ӈяпту няамвантата вешата ӈукаӈпой ӈайты. Община’’, совхоз’’ каԓитани’’ катамы’’ каԓитоӈ’’ «Пур-рыба» нимита предприятин’ миштутуӈ. Таняна мансԓанна’’ ӈопшеԓы дюԓкат ва’та ӈамаԓ тэмс каԓяхат шеԓташту’’.
Лариса Айваседо патмы
