Няръяна Ӈэрм
Лаханако ваде’’мы’’
Ӈэрё’ няна ӈацекы’’ ненэцие’’ е’’эмня «Коммуникативная площадка» нюбита проект миӈась. Тамальӈгана мале сян ненэць’ «Ямальские молодежные инициативы» грант’ еси’’ няд’’ми ня’’маць. Тикы’’ поӈгана Сёяха’ тер Софья Салиндер мэсь. Пыда «Этно-фестиваль ненецких сказок» проектм’ серта таслась.
Время для чтения ~ 2 минуты
Софья няхаромдэй по’ Саляӈгардахана «Социальная культурная деятельность» манзая’ няю’ тохолку. Нямэхэна минреванда серта нямна тарця вади хэтась:
— Мань хар’’н хардаханани практикам’ мэтадм’. Таминда интернатхана илена ӈацекы сё мэти’’ няби тарани’’ мят’ ма’’лаван’ харвадм’. Хусувэй группа’ тер лаханаком’ вадета. Сиддо’ нянандо’ манзаранидо’, культура’ мякана манзарана’’ нядабаӈгу’’. Ӈацекы’’ пыхыдадо’ манэ’’лабтаӈгу’’, вадавнандо’ лаханаӈгу’’, теневабцодо’ ӈокамдаӈгу’’, спектакль сертаба тохода’’.
Ненэся вадада мин’’ӈась, сита нядаць, нянда еси’’ няд’’ми ми’’ӈаць. Есида няд’’мяць фестивальмдо’ ӈули’’ сававна мэ’’ӈадонзь. Тохолкода’’ ӈацекы’’ ёльце варемдо’ мэ’’мыць. Хибяхавадо’ тёнякоӈэ таравы. Ӈани’ хибяхав лакамбой’ тэваси, харад хоркы, вэнеко, ӈэвы. Пыдо’ манэ’’лабтамбавы’’ лахакудо’ ти’’: «Теняку няби тэваси», «Харад хоркэця», «Вэнеко нядамда пю», «Писяко». Тидхалеӈгода’’ поӈганандо’ сямянхат сававна лаханавы не ӈацекым’, хасава ӈацекым’ тэрабавы’’. Лаханакомдо’ тид’’ манэлабтавы ненадумдавы’’. Саць тарана серм’ ӈобанзер’ пирдале’’.
Ӈарка таром’ ха’’авравы ӈока. Софья’ мяд’ тер’’, Сёяха’ тер’’ ӈэдакы’’, мал’’ нядаӈговы’’. Таддикахад ненадовна небяда табековы. «Лабтэйко» нюбите театрм’ минрена тарця серка’’на мале торомбэй.
Автор: Анна Яптик’ падвы
Авторы
Няръяна Нгэрм
Темы