Ламбидо’ хайна мимы’’

Теда’ нувона’’ нара’ няю’ пядо’. Яляна’’ сэв тю’’уна’ ханаць пэй’’. Хаця’’ тецьда’’ сусава’ сер’ харад’ тер’’ ненэця’’ ламбидо’ тюхулцеты’’. Хардато’ хэвувна едейкурцеты’’. Тикахад ненадовна сёбар’’ ӈэхэвабто’, ӈодь’’ сыра ха’’ам’’махад ламбидо’ ӈадимдесетыдо’.

Время для чтения ~ 2 минуты

Тандая’ Сэрпива’ мяд’ тер’’ Москва март’ ӈэдалёрмы’’ таняна самлянзимдей Троицкой марафон ӈэвы. Едэйко Яр-Саляхана ӈацекы ламбита тохоламби. Пыда тарем’ лахана:

— Пирдырта’’ Санкт-Петербургхад, Башкирияхад, Тульской, Тверской, Брянской, Самарской область’’ няд товыць. Маньрина’’ Ямалхад ӈаваць. Таняна нумда иба ӈэвысь. Тарця тецьда’’ пуд тиртядарев’ миӈаваць. Сехэрэва’’ ӈод’’ пэдара’ помна вэӈгалысь. Мерцяда яӈгусь, яля’ сэври ябересь. Пирдырмана’’ нерцю’’ ламбина’’ сававна масаръянаць. Самляӈг ю’’ километрм’ няхарӈэ пирдалеваць. Нянани нисями тикахад нюдямбой нями мэӈаханзь. Нисяни мат’’ ю’’ самляӈг пода, ёльце пир’’ӈада. Хусувэй по’ хуркари’’ марафонха’’на мэ. Ӈацекы’’ ненэцие’’ пирӈэ харва. Ненэся ва’’лёй! Тад нерня’ Екатеринбург хардахана ӈэванда «Европа-Азия» марафонан’ хамекодава’’.

Сяхаӈгав’ Едэйком’ няби Валерийм’ нисяди’ тохоламба пявэхэюда. Харта ӈацекэхэюта хавна тохолавэда ӈани’ ӈока. Тедалахана хуркари’’ пирдырмаха’’на мэсеты’’. Леонид Ларивич яра’ иры юдимдей яляхана соя’’ма’ ялямда мэ’’ӈась, мат’’ ю’’ самляӈг поданда хаясь. Е’’эмнянда сава вади ӈэдарамбива’’. Сенз ӈэя, мэнена манзаямда нерняри’ минремда.

Автор: Анна Яптик’ падвы

Авторы

Няръяна Нгэрм

05:10, 21 февраля 2024

Темы