обновлено: 11:47, 21 июля 2023
Няръяна Ӈэрм
Лекар’’ ӈэдалёрӈа’’
Маӈгты’’ иры’ пиркана вымна тиртя ӈанохона лекар’’ ненэцие яӈгабаванзь тилсетыд’’. Тарем’ пыдо’ поса’ хабцяӈгад яӈгана’’. Хахаяда яля Приуральской районхы лекар’’ мякана манзарана’’ пэ’’ тэлха’’ ӈэдалэйдаць. Ӈоб’’ танямна ядэрмы нява’’ — Лидия Яр. Аксаркахад ӈэда лекар не. Ӈэдалёро’’мита нямна тарем’ лаханась.
Время для чтения ~ 2 минуты
Манзаява’’ няхар’’ си’’ив ялян’ тярмы. Си’’ив яля’ пудана няхар’’ ныланава’ яляхана ӈэдалёрӈава’’. Нюртей ядэрӈаваць. Яля’ ямбан’ ӈэдалёрӈаваць, сидя юд’ мян’ мят’ нултаӈгаваць. Ӈоб’’ яля самляӈг юд’ мян’ ненэцям’ яӈгава’’. Ханяӈы’’ ни’’ харва’’, ма’’ним’’ хар’’на’’ хардан’ тоб’’нана’’ пардондава’’ ӈабтаӈгува’’. Теда’ ӈабтабато’ ӈамгэри тарцяндо’ хадкэб’’, тикаривна ханя’ ханда’’, тосавандо’ е’’эмня пардон ни’’ ӈабтамбю’’. Ненэця’’ падро падыби’’. Пуна ненсяри хардан’ тоб’’нандо’ харто’ лекар’’ мят’ ядэрта’’. Тарабата тамна тивак’’ хабцяӈгад пардон ӈабтамбиваць. Тарця пардонхавад пуня’ ниць ӈа’’, таравамда ёльце сававна хамадамбидо’. Харто’ ӈод’’ ненэциена’’ сёнзито’ мюй’’ хабцянзява’ нямна етри’ няркана’’, тарабата сяхаӈгарт’ пуня’ ни’’ ӈа’’.
Маня’’ укол ӈабтамбадаӈэ хавнана’’ ӈацекы’’ лекар нянана’’ ядэрӈась. Нява’’ нё’’лёко ӈацекы’’ кашад, тарана пардон ядэлась. Хаӈгурта’’ таняб’’, манэ’’саръядась.
Малкось вэнеко’’ ӈани’ хуркари хабцяӈодо’ таня пир’’ӈадо’. Хаӈгурта вэнекор ненэцям’ ӈани’ хаӈгулабтаӈгуда, нядандо’ палаӈгана хабцяӈодо’ таня’’.
Пэ’’ тэлхана ханзо. Ты пэртя’’ ӈули’’ таӈга’’. Тикы’ нерцюна тамна хад ӈэвы. Тандая’ тыдо’ ӈобт’ малюрӈа’’, ханяӈы яхана хадырць тэри лехэбты’’.
Автор: М.Яр’ падвы
