Няръяна Ӈэрм
Лекар’’– тарана манзая
Терапевтӈэ тарана лекар’’ хуркари’’ хабцям’ таминда тасла, хусувэй хаӈгурта хэтыбада вадам’ хамедабта тара.
Время для чтения ~ 4 минуты
Тарем’ Михаил Вэнго, маркы лекар’’ тасламбида. Пыда Ямал’ няна Сёяха’ школам’ ёльце’’махаданда таминда’ манзара пядась. Хасавако хамедамбидась: небянда, нисянда нядаӈгодаӈэ тараванда, ӈадьбянда маймбась хоян’ хаясь. Хуркахарт манзаям’ нисеты пилюс’’, хусувэй сер’’ ныхында пирувна ӈась.
— Тайбей’ хойхана мюсерта ненэця’ мякана соядамзь, таняна вадыдамзь. Небяюни’, нисяюни’ хэвхана иринана’’ илесь явна мюсерӈадамзь. Си’’ив похонани школахана тоходана пявась. Сёяха’ интернатхана по’ ямбан’ илесетыва’’. Мядона’’ мале ӈахакуна нусеты’’, каникулка’’ валакада та’ ёльцяӈгана тэворцетыва’’. Таняна няхар’’ ирий’ ямбан’ маймбась, варева’’ мэць нина’’ хэвхана мэсетыва’’. Ӈацекэӈэ ӈарка нина’’ хусувэй серкана нядабасетыва’’, — Михаил иламда тензебтемби.
Нюдя ӈэванда мальӈгана ида ядэрцеты: «Сяхари’ ты’’ лекараӈэ тохолкодадм’». Пыда сита тотрев’ ӈока хой’ тер’’ ӈацекы’’ ибедорцеты’’. Тарця манзаям’ пэртя ненэцие выӈгана саць тарана хибяӈэ пэрцетыдо’.
Мюсерта лекар’’
Нись’ хамеда’’ синдтет по’’ пуняна хаи’’. Михаил хой’ илевам ёльце торомдадась, ты пэрмахана хусувэй серм’ теневанаӈэ, сава ты пэртяӈэ хаясь.
Нерня’ тохолкованзь харвабцода ихинанда ханяхарт нись хань’’. Михаил янамбовна экзаменха’’ хамекосеты. 2006 похона Салехардан’ аграрно-промышленной техникуман’ ӈэдалэяць. Мале пон Салехард’ ӈэсонд’ ӈэдалёсь, яноларавы’’. Техникумхана экзамен’’ ёльцевыдаць. «Теда’ хуркадм’ ӈэӈгудм’», — ида хэбилей’’. Тамальӈгана медицинский училищехана экзамен мимыць, Михаил падрода таня’ тэврэйда. Ӈацембой хасава фельдшерской отделение’ студентаӈэ хая. Несэй манзаям’ е’’эмнянда торомдамбись.
— Илекавна илми сюрхалъяць. Лекараӈэ пыхыдами сяхаӈгарт нисетыв тасламбю’’. Харта тарем’ хая. Харвась тохолкудамзь, тоходанавами сававна миӈась. Няхар’’ по’’ хэ’’мяхад дипломами ня’’мадамзь, тикахад Тазовской районан’ тэвываць. Вымна мюсерта фельдшерӈэ тарадамзь. Ты пэртя’’, халядана’’ мядо’’мана ӈэдалёрцетыдм’, факторияха’’, хаӈгурта ненэцие’’ мят’ тэворцетыдм’. Етри’ тоенасеты, ӈопой яхана нисетыдм’ хасена’’, мюсерцетыдм’. Теневабцуни мэйрабидамзь. Манзаравами нянани маймбабцось, — Михаил Семёнович лахана.
Едэй тохолковада
Самляӈг по’’ ямбан’ манзараванда пуд тамна нерня’ тоходанава’ нямна ида ядэлы’’. 2020 похона пыда Тюменской медицинской институтан’ тохолкованзь тэвы’’.
Ӈарка маркана хусувэй ӈамгэ мэкадархась, ихинанда сомбой хибяри ядабтамбасеты, лаханакурць няцетыда:
— Сава тохолкода’’ си’’ми тохоламбиць, медицина’ нямна ӈока несэйм’ ихини пакледамзь, луци’’ культура’ нямна теневанами ӈокамдадамзь. Иринани, нисянани ила’ саиркавм’ сяхаӈгарт’ нисетыв’ юрыбю’’.
Тюменьхана тохолковамда ёльце’’махаданда Михаил ӈани’ Ямал’ няю’ тэвы’’. Новой Порт’ лекар’’ мят’ тось. Хаӈгурта ненэцие савумдамбись. Няхар’’ по’’ тарем’ ваерась, тикы’ пуд Ненэцие’’ автономной округан’ тэвы’’. Маня’’ яхана’’ ӈарка пэвдэй ирийхана тось, 18 яляхад Няръяна маркы поликлиникахана лекараӈэ тара, пыда — терапевт.
Ӈарка ява’’ — манзарась яда
Минрена серота нямна тасалкурӈа:
Манзаями тянё ни ӈа’’, ханяӈэхэна округ’ лекар’’ мякана стационаркана нядаӈгосетыдм’. Таӈы ёльцяӈгана ханяӈы нина’’ отпускхана мэ’’, ӈадьбяни сидя участокм’ минредм’.
По’ пеля Няръяна маркана иледм’, савов. Ӈопой, ненэй вадавна лаханана’’ ненэця’ тянё, ӈокаюм’ пелядо’ вадамдо’ ехэрадо’. Мюсерта’’ мяк’’ тэворман’ харвадм’. Хой’ нямна ими ядэрцеты.
Теда’ маркана хаӈгурта’’ хусувэй яля’ турцеты’’. Маня’’ серканана’’ хусувэй лекар’’ манзаямда сававна теневабта тара. Хибяри хаӈгулабта, сямянхат нерде’ терапевтан’ тосеты. Хабцянда хурка ӈэвам’ таслаӈгуда, тараб’’нанда ӈани’’ лекараха’’ ӈэдабтаӈгуда. Хабцям’ мер’ таслаб’’, ненэцям’ мер’ нядаӈгур.
Няръяна Мар’’ ӈарка ни ӈа’’, турта’’ мал’ теневына’’. Хаӈгурпато’ ӈод’’, ванерабтёсь кабинетхана тюсеты’’, ихинани сибё ӈэсеты. Тикахад си’’ми нядабада медсестрами манзаямда тид’’ теневабта, хибярихи’’на сава ӈэсеты.
Автор: Юлия Талеева’ падвы
Авторы
Няръяна Нгэрм
Темы