Лэсё хоркы

Лэсё хоркы ӈоб’’ седа’ ӈэва’ нина пили’’ илевы, ханяхарт’ тикы яхаданда нивы ханас’’. Сырэй тецьда ёльцяӈгана ӈани’’ хоркы’’ еси’’ няво’’ ня’ хан’’мы’’. Таняна неру’’ поӈгана хэӈг, ӈавар’’ ӈока, сырада нюлак. Лэсё хоркы седакоходанда ханяхарт’ ни харва’’. Пи’ седаконда хэӈгкохона сыра мядикохонанда хонёсеты. Ӈавраданда ханюй ӈоди, неру’’ малкэци ӈорцеты. «Хэвнямна хумбанзи’’ ӈавэда пюрта? Седакохонанда ӈаврада ӈока», -ида тарем’ ядэрцеты.

Время для чтения ~ 3 минуты

Ӈоб’’ сыра’ сата’’ тецьда’’ то’’. Ӈэрм’ хадхана выӈгы я ӈули’’ туху. Хоркэцяи ӈаврадамда седакоходанда маяндорць хомби. Есяраха’’ парондэй’’ ныхысяда’’ ӈэкцяханата сиръито’ яӈгу’’. Хахаяда’’ неро’’ мал’’ туху’’. Ӈаха’’мна тирць хоркэцяи ныхысялма. Таддикахад ӈо’’ ӈамгэ теневана яханда ханда? Иланда ямбан’ седакоходанда ханяхарт’ хан’’мада яӈгу. Ӈэрёй сабкавы сыра мядикомда илебцяртанда мэ’’ӈа. Сата тецьдахана тиканда хэӈгахана мэсеты.

Тюку яля’ няхар’’ ханюй ӈодякоцям’ ӈод’’ маӈгханда хо. Ӈэрм’ мерцяхана пулараӈгаван’ харва, мядикохонда маяндорць тэвы’’. Хоркэця мядиконда мюна мале сян яля ӈаворципой’’ юседа. Тай’ юрка ныхысялма. Тэри ирида ядэрӈа: «Сеня’ ӈавнанда нини’’ еси’’ моӈгаха’’ си’’ми хаӈацяню’’, ӈамгэ нидм’ намд’’. Тедав’ хавандархадамню’’».

Ӈамгэ’ ёльцяӈгана хоркы мерця’ таха’’мана вэнеко’ тёрм’ намда. Сеянда хэсь тамна ӈыльняку’ хасерй’’, сэвда хаямла.

Та’ ёльцяӈгана Илку седаку’ ядувна ӈэдалёвы. Неранда няна нявотада хакцяда хаван’ харвана хоркэцям’ сыра’ ӈылад ӈабтанда ед’ ховэда. Илку хоркэцям’ хоба’ мю’ юяць мяканда ханада. Мякана ханимы хоркэцям’ ту’ хэван’ юсебталадо’. Няхар’’ яля Илку’ хада хоркэцям’ савумдамбида, тетюмдей яляхана сэвда нэйда. Илку’ хада ӈобӈгуна хоркэцямда хонрада:

— Ӈамгэ седако’ нина ӈопойӈэ сыра’ илен’, няха’’нат ӈамгэ еси’’ моӈгаха’’ нин ханас’’?

Хоркэцяи ха’’манда? Харта лэсёванда е’’эмня хаё’’мада нянанда сяткабтысь. Мунзи’’ тецьдахана ханьмы’’ няръяна’’ нирцьеда манзабтамбись.

Тедахав’ хоркы ӈаврада ӈока. Илку’ мя’’ яха’ моӈгахана ӈа, хэвхэда ӈарханда неро. Сеней’’ хэвы’’ нида тикахана мэвы’’.

Автор: Эмма Вануйти’ падвы

Авторы

Няръяна Нгэрм

05:22, 19 января 2025

Темы