обновлено: 09:26, 19 декабря 2023
Няръяна Ӈэрм
«Лимбика яля»
Яна’’ тер’’ ненэця’’ ӈацекы’’ е’’эмня ӈуда’ тер ма’’лавы’’, тэмдавы’’. Пуна мядонзэйдо’ яӈга таславы ёхо’’ тэвравыдо’. Пыдо’ мал’’ округна’’ тиӈгэвна минда «Тёплый день» акцияхана мэвы’’. Тарця сава серм’ 2014 поход яна’’ ханярина мэ’’ӈадо’. Хусувэй хардахана едэй по’ ед’ сертабидо’. Москван’, Санкт-Петербурган’, Тюменян’ илеванзь хэвы’’ нина’’ ӈобтикы акцияхана мэсь пирмэдо’.
Время для чтения ~ 3 минуты
Саляӈгардахана илена’’ мядонзэйдо’ илебей ненэцие’’ мэлава’ хардан’ тэвабидонзь. Ныланава’ яля’ хубтахана мале панта пад, ларас минрена’’ ӈадибелыдаць. Ядэрта ӈули’’ ӈока ӈэвась пэрӈась. Ӈадьбята мяд’ мюня нё’ си’ хэвхана нядаӈгодаӈэ тарана’’ сиддо’ ӈатець. Волонтёр’’ сехэрэмдо’ тидхалембиць.
Ненадовна «Тёплый день» акциям’ илебей ненэцие’’ центрха’’на манзаранаха’, яна’’ серо тасламба нядаӈгодаха’ Некоча Окотэтто няби Сержи Кельчина минрединзь. Марад’ тер’’ тэврамбада ӈамгэри ня’’марпихинзь, падыбихинзь. Пуна тикыди’ тамна’ тяха’ нядаӈгодахати’ мипидинзь. Нядаӈгоди’’ поӈгана ненэй ненэцие’’ тэнзм’ мэта’’ таняць. Пыдо’ ёльце харбёвна манзараць. Ӈопойдо’ нябимдей по’ тохолкодась — Юлия Яптик. Мядонзэй сомбой саламгана падар’’ мю’ пэбтабаванда сер’ нянанда лаханакурӈадамзь:
— Ӈамгэри тикым’ падаркана сыхыдава ӈани’ нензел’’ нивы ӈа’’, яӈга теневабцо’’ таравы’’. Тарем’ ӈод’’ едэй манзаям’ тохолавада харада юӈгу. Торомбэрка’’ няха’’ни сырӈадм’, тоходанадм’. Нюртей мэва’ тюкохона нядаӈгурӈадм’. Ет’ хуркари ӈаво тэвола’’: сянаку’’, хамбетка’’, ембдяр’’, сёбарка’’на тарана’’ ӈамгэри’’, ханако’’, телефон’’, паднабця’’. Ӈацекы’’ едэй похона хурка мядонзэйм’ ня’’маван’ харваса’’ тарцям’ ня’’маӈгу’’. Хусувэйдо’ маймбаӈгу.
Ненэця’’ яля’ ямбан’ вэрнаць. Лохо’ мюй’ етри’ панданась. Ямална’’ ӈэвахана мэна турӈась. Пыда самляӈг сёбар’’ ӈацекэн’ мядонзэй тэмдавысь. Открыткахато’ сейхад минда вади падась. Ямал’ тер’’ ед’ тарем’ лаханась: «Тёплый день» — сямянхат сава едэй по’ нерцю’’ ӈадимдембада акция. Ӈэрм’ яхана’’ илена’’ маянд’ еремы’’ нидо’ сяхари’ нядабасетыдо’. Похо’’ мядонзэй мипада’’ ӈокамдана’’».
Салехард’ серо минрена ерв, марад’ тер’’, ӈэрм’ тер’’ ненэциена’’ ненадо яляхана мал’’ манэ’’янаць. Небойнда тотрев’ няхатата нюдякодо’ Сэротэтто Нечей’ ненюсь. Ариана небянда ня’ пэ’’ няна илена хасава ӈацекэн’ конструкторм’ тэмдавэхэнзь.
Автор: Анна Яптик’ падвы
