обновлено: 05:10, 07 декабря 2023
Няръяна Ӈэрм
Луcляӈг харв
Я’ сяр’ ниня ненэця’ ӈокаюм’ пелядо’ харто’ яханато’ иле’’. Тарем’ ӈобкана невхы иринато’ вадам’ лахана мэ’’ӈа’’.
Время для чтения ~ 3 минуты
Таӈок ненэцие’’ тэнз’’ поӈгана ненэй ненэця’’ харто’ яханандо’ невхы иринато’ таславы мюсермам’ нерня’ минре’’. Тэхэна мэ’’, халям’ пэрӈа’’, хане, ӈацекыдо’ сава серк’’ табедамби’’.
Тюку илаӈгана вадам’ теневава’ нямна пэртя манзая ӈока, ӈарка таром’ минре. Ӈацекына’’ школахана тохоламбидо’. Ненэця’ вадавна учебник падыби’’, падвы книга’’ ӈани’ таня’’. Радио’ мутравна, телевидениехэна ненэй вадавна ӈани’ лаханасеты’’. Тадтикахад мале юркад ӈод’’ тянюмбой по’’ ямбан’ «Няръяна Ӈэрм» газета ӈадиберӈа. Ӈари’’ теда’ газетам’ ханярина толабидо’.
Хусувэй ненэць’ пили’’ нерде’ газетам’ толаба пявамда нивнядав тене’’. Мань ӈани’ ихини ха’’морцеты, сяха’ нюртей газетам’ хосав.
Хибяв нивняв ман’’: школахана. Яӈго, мань школахана ненэй вадам’ нивась тохоламбю’’. Техэ’’ похо’’на тохоламбада серо’’ поӈгана ненэця’ вада яӈгусь. Ӈани хибяхав нивняв ман’’: книги ӈэсь мякана. Яӈго, таняна ненэця’ вадавна ӈэда газета манэ’’мэми яӈгу.
Ненэця’ вадавна ӈэда газетам’ маня ненэй мяканани ховась. Тет по’ ямбан’ санаторной детской домхана иледамзь. Ӈавнандо’ тивакани вэва ӈэва’ е’’эмня си’’ми ханаць. Таняд 8 классахана тохолковани маляӈгана тодамзь. Ӈобаӈгуна урокани ёльце’’махад ненэй мякани тэвыдамзь. Небяхаюни’ нисяни’ ня мякананди’ сидямбохо’ ӈэвэхэ’. Мяна’’ мюй ӈули’’ ядембись, небями едам’ пирембись. Нисями ма:
— Тяхана ненэй вадавна падда лаханако танясянё. Толахаркарт.
— Ненэся ӈод’’, танясянё. Тяхана хэхэ’ хан’ мюня сюры.
Небяеми ӈарка пухуця вуни ӈа’’, ӈопой санэй’’. Хэхэ’ лабтэй’ мюд ӈадимдеда. «Няръяна Ӈэрм» газета, яланда ӈопой страница. Мань теда’ нив тене’’, ӈамгэ по тикахана падавакы… Нюртей страницахананда партияна’’ нямна ӈэда’’ сер’’, халям’ пэрти’’, тэхэ’’на мэни’’ манзая’’, пудана юн’’ падавакы’’. Тадтикахад хибя редактор ӈэвакы, ӈани’ нив тене’’. Ӈули’’ сававна пудана страницам’ тенедм’, таняна ненэй вадавна стихдарев’ падавы лаханако танясь. Нюмдя — «Лузляӈг харв». Тикым’ падвы Леонид Лапцуй ӈэдарахась.
Тамаляӈгана мань ненэй вадавна падада газетам’ манэць ёльце маиваць, хамэдавась: «Ненэй ненэця’’ я’ сяр’ ниня иле’’, вадамдо’ мэ’’ӈадо’, нерня’ ӈацекыдо’ тохоламбидо’».
Автор: Анна Ламдо’ падвы
Фото: Архив газеты Няръяна Ӈэрм»
