обновлено: 04:40, 11 августа 2023
Няръяна Ӈэрм
Малкурць пэяд’’
Теда’ выӈгана, пэдара’ поӈгана мараӈгыта’’, ӈодинда’’, тудакунда’’ ӈокама’’. Малкурмам’ харвабтана’’ таӈгм’ ни’’ хомбю’’. Хусувэндо’ таславы ёда таня’’. Хибяри тикы яхата яда, ӈанохона, машинахана хан’’ӈа. Ӈани няхата малкось ёда нида вадес’’.
Время для чтения ~ 4 минуты
Маня’’ ӈэрм’ терӈэ мараӈгы, ӈоди маламбавам’ харвабтава’’. Пудана по’’ ямбан’ мале луца’’ иланд’ тэв’’махадана’’ выӈгана иленахарт’’ тудакуӈа’’, сававна пиревы’’ ӈани’ ӈавыдо’’ӈа’’. Ӈопой, ӈока ӈэбто’ тэхэ’’на вэва. Ӈарка ненэця’’ манзеты’’, ты’’ тудако нюракуць ядэрӈа’’. Выӈгана вадёвэӈэ мараӈгыма’, ӈодима’ нямна хуркари мэкад иле’’мина’’ таня’’. Маркана илена’’ ненэй ненэця’’ нини’’ ханзер’’ ӈоди’’мамдо’, мараӈгымамдо’ ӈани’ ваде’’ӈадонзь.
Галина Ӈокэй ма’’нисяв:
— Март’ иле тэв’’махадани, мараӈгыць, ӈодинзь таславы ёни таня’’. Мале сянӈэ ядэрцетыва’’. Ӈокаӈэ пон’ мэвава’’ нива’’ хамедасету’’. Тюку по’ ӈод’’, мале пэдаран’ ядэрӈаваць. Мараӈгы ма’’лаваць. Пудана яля’ сарё ӈэ’’мяхаданда яда саць нюларта, ядэрма серта яӈгу. Ӈани похотана’’ яноць ханӈаваць, мараӈга’’ мале вомыць. Тудакоховм’ сабе ниваць ху’’, хомбавына’’ тиман’ харвавыць. Ма’’лавыни пирембасетын’’, ханяӈыдо’ сыра’ ӈэсонд’ тэвсетыд’’. Сыра’ тецьда нумгана таӈы ма’’лавы мараӈгыд толь’ ни’ тад’ мэӈгуд, ихиня ёльце сава. Минханд таӈы малкомид тензебтеӈгун. Тарем’ ядэрць хибяри ӈэвамда сибимдемби.
Лидия Ярой малкомида тензебтембида:
— Маня’’ ӈавна небява’’ манзеты: «Хэ’’ муноп’’, мараӈга ӈока ӈэӈгу». Невхы хаданана’’, иринана’’ вада ненэся ӈэдакы, нинякы, та’ ямбан’ хэ’’ муно намдорӈаваць. Выӈгана мараӈга танява’ сер ӈа. Теда’ пэдара’ поӈгана мараӈга’’ паӈодо’ мале хэвысь. Мань ханяна иледм’, таняна тандая’ сававна мараӈга ӈадимда. Тудако’’ паӈо ӈэӈгу. Мале сян яля малкур’’махадана’’, сяни’’ ед тэврасетыва’’.
Ӈацекы ӈэвана’’ мальӈгана, мяна’’ тер’’ нини’’ ня’ мал’ мараӈгыманзь ханцетыва’’. Помнана’’ пирдырцетыва’’. Тамальӈгана няхатани нюдя ӈэб’’ни’ ӈод’’, нидм’ выдараӈгасету’’. Ӈани харвабтавэва’’ — мюсева’ ёльцяӈгана мараӈгы’’ма. Ӈобаӈгуна, нябакохонани тибидамзь, хан’ вэняна тэри ӈамдёва серта яӈгу, хан’ лехэхэна хаюрта’’ мараӈгы нэкалпа пядамзь. Сюдбя мараӈгам’ нэкалманзь пя’’махадани, хан’ лехэн’ мантэвами нивэв хамеда’’. Тад сававна ини ӈут’ тось, ямб хан’ ӈылна мале мэвэдм’.
Анна Яптикы вадамда тарем’ ханадась:
— Ӈодяв’’ тарси’’ тыракабты’’. Ненэйвана тудако саву’’ӈадм’. Ӈавнанда небяни, нисяни ӈавар’’ нибто’ ӈа’’ ӈод’’, ӈули’’ харвабтэян’’. Тудакуни’’ сыра’ ямбан’ танясеты’’. Ханяӈэхэна мядондаха’’ ӈуда’ терӈэ мипасетын’. Тамна хани’’махаданда емзьдей ӈадимда. Нердена тецьди’’ пуд ёльце савумзеты. Ӈацекы’’ ӈэвани мальӈгана, сини ӈар’’ нини’’ ня’, сыра’ ӈылад сабкабасетына’’. Теда’ малкурманзь машинахана ядэрцетыва’’. Харад’ хэвхавана ненэця’’ минхандо’ ма’’ламбидо’, ӈадьбяна’’ ӈыхы ян’ ӈэдалёрӈава’’.
Хабей не нява’’ Зоя Куртямова ма’’нисяв, манзаравани нид, ӈыхы ян’ нидм’ ядэр’’. Мараӈгам’ ма’’лаванзь хэвани мальӈгана тамна холкавдавэйць. Ихинани мер ма’’лавы’’ ханяцей сава’’. Ибцекаӈэ серта’’махад пон’ переӈгу. Тудакуни ӈани’ лохомдэйнась.
Тарем’ малковава’’ — ёльце сава сер’’, пыдара’’ ӈод’’ ӈодиманзь ядэрӈада’’.
Автор: М.Яр’ падвы
