Няръяна Ӈэрм
Мараӈгам’ нюбе’’ӈа
Округханана’’ «Морошка» нюбета картам’ сертаць. Тарцям’ пенсияхана мэна’’ӈарка ненэця’’, ӈацекы’’ ня’’марпаӈгу’’, нянандо’ няд’’маӈэ тараӈгу.
Время для чтения ~ 1 минута
Тикы проект Ямална’’ ӈэвахана мэна ервана’’ вато’ сер’ таславы. Тэмдорць мэта «Мир» нюбета ӈарка яна’’ тиӈгэвана ӈэда системам’ няд’’мяць сертавэдо’. Округханана’’ илена’’ ненэця’’ нюхуто’ тарця картам’ нэсь пирӈа’’, ӈамгэрим’ тэмдаба еся ӈэсяӈэ таславы ни ӈа’’. Тикы’ хавна ханяӈы’’ «стикер»м’ мэта’’. Ӈацекы нензел’’мана мэць пирмамдо’ харто’ таслаӈгудо’. Тохолкода’’ урокато’ хавна ӈани’ ханяри’ ханцеты’’, таёльцяӈгана «Морошка»м’ интернет’ мутра’ сер’ мэтадо’.
Тедахав тет яӈота неракоход сертавы ӈамгэрим’ нянандо’ минартадо’. Тахабтавы, ё’’мы ӈэбто’, ӈанисэйвана серта, тэмда тараӈгу.
Ӈокханда юкад вата си’’ив ёнар’’ картам’ ӈадимдевы’’. Тарцям’ ня’’маванзь яра иры’ нюртей яляхана МФЦэн’ хэсь тараӈгу. Ӈани’ лаха самляӈг юрм’ выӈгана илени’’ тохолкода’’ ню’’ е’’эмня сертавыць.
Солне Окотэтто’ падвы
Авторы
Няръяна Нгэрм
Темы