обновлено: 05:54, 13 октября 2023
Няръяна Ӈэрм
Мел’’ нехэ’
Ӈарка яна’’ тиӈгывна мел’’ ненэциена’’ хуркари’’. Ханяӈэхэна хэвхананд ӈудикода нянд илевахад ехэравэн ӈэӈгун. Тарем’ хахаяда яля’ сидя ӈэрм’ тер’’ нехэ’ выставкам’ сертавэхэнзь. Горнокнязевск харад’ няна ной паны, ӈухуко, ной’ ни, тамна ӈани’’ ӈавэ манэ’’ӈаваць.
Время для чтения ~ 3 минуты
Нина Геннадьевна Кельчина таславы час’ нерня’ мале ӈопойӈэ лохо’ мюня ӈамдёвысь. Пыда сидта ӈэрм’ тер’’ нина’’ ёльце сававна тенева’’. Иланда ямбан’ выӈгы ӈацекэхэ’’на санаторно-лесной школахана манзарась. Ёльце саву’’цетыдо’. Теда’ нябакова’’ едэй серм’ няна’’ ӈадимдесь. Вадамда тарем’ пядась:
— Ӈокханда тюкон’ 220 ӈухуком’ тэврадамзь. Ӈокадо’ ӈавна ӈацекыни’’ ня’ ӈобкана сертабавына’’. Ӈокдавнандо’ юрӈэ харваӈгу’’. Тамна пелдо’ нара’ няна мякандо’ нянандо’ ханласетыдо’. Теда’ тодо тэнз’’ ненэцие’’ ӈухуко тэврадамзь, поӈганандо’ сейхани лимбикавна ха’’мортами таня. Мат’’ ю’’ няхар’’ пода. Ӈацекы’ ӈэвани мальӈгана нисяни сертавы. Тамальӈгана ӈысма’’ хардато’ мюй паранана пэвдю’ ютекаха’’на ялэмдамбидонзь. Ӈопой тарця парана’’махад нердена ӈухукодми сертась. Тедалахана лэтамбив, ня’’амбаб’’нани тамна нюдяко ӈэ’’мини тензебтембасетыдм’. Тиками сямянхат тарана ӈухукоми. Ӈани’ ӈопой ненадо ӈухукоми Америкахад тэврадонзь. Интернетвана Эдуард Хабэчевич Яунгад падна: «Лукос ервханда ӈэрм’ ян’ миӈа». Тикахад хамедав, тарця кукла мякани ӈэдалёда ӈэӈгу. Ӈамгэ’ пиркана ненэсяри’’ нёвнани ӈадимя. Лукас няни тэвванда е’’эмня няби я’ панхад тось.
Няби мел’’ не — Вэнго Светлана Леонидовна, ӈобтикы Салехард’ тер. Ӈавнанда соё’’ми’’ ёда Сюнай Саля’ няд ӈа’’. Пыда ненэй ненэцие’’ паны’’ нямна сэдора теневавы. Ёльце мел’’ не, ной паныда сяни’’ яӈорэй ӈодякохо’’на, паӈгалмы ни’’ иняха’’на падтавы’’ ӈэвы’’. Мале нюдя ӈэдаханда нибям’ ня’’амбида. Теда’ Салехардахана Е.В. Образцова’ нюмам’ мэта Школа искусств’ мякана манзара. Таняна нюдяко ӈацекы сэдора, панорць тохоламби.
Ненэся ӈэвами, нивами манэ’’ман’ харвабата’’, таня’ ядэрӈада’’. Выставкадо’ хор’’ иры’ 31 яля’ ӈэсонд’ манзараӈгу.
Автор: Марина Ярой’ падвы
