Няръяна Ӈэрм
Мел’ ненэцие’’ поӈгана ва’’лёйха’
Тюку пом’ ӈоб’ няю’ нятва’ поӈэ мэ’’ӈава’’. Ӈадьбята ӈарка яна’’ ӈардавна хуркари’’ ненадо’’ серо минрева’’. Тарем’ тодо’’ нина’’ ила’ саир торомдамбива’’. Поёна’’ сава ӈэсь иле енава’’.
Время для чтения ~ 2 минуты
Лимбя’ ирыхына 23 яля’ Москва маркана ӈарка выставка-форум манзара пэяць. «Уникальная Россия» нюбе’’ӈа. Яра иры’ сидндетимдей яля’ ёльцянд’ мел’ яна’’ тер’’ манзаи манэць пиртава’’. Сертавы ӈаворидо’ ӈули’’ ӈока’’я лохо’’ мюня ӈа’’. Си’’ив ю’’ си’’ив ё’’ няд манзаидо’ тет ёнаркад вата’’ ненэця’’ ӈэдабтавыдо’.
Нердена яляханандо’ Департамент информации и печати’ ӈэвахы ерв Мария Захарова лаханась. Ӈобт’ ма’’лёвы’’ нида саву’’ядась:
— 2026 пова’’ ӈоб’ няю’ нятва’ поӈэ мэ’’манзь таславэва’’. Ӈока илека’’ серо тикы ина’’ ӈудм’ нёда сертабаӈгува’’. Ханяӈы’’ хонаркурцеты’’: «Ӈоб’ няю’ нятва хурка?» Ненэця’’ тодо’’ яха’’на иленё’’, иландо’ саир’’, вадидо’ яӈганё’’. Невхы’’ хэхэдо’ ӈобтикы тодо’’ тэнзнё’’. Ханзер’’ ӈоб’ няю’ нята пиртадо’? Ӈадьбята тикым’ хамедава’ е’’эмня «Уникальная Россия»‘ то’’олха’’ выставкаха’’ ядэрць тара. Тэри хусувэй лохо’ мю’ тюӈгуда’’, харта’’ таслаӈгура’’, ханзер’’ тэнзувнато’ яӈганя’’ ненэця’’ нито’ хэвхана иле’’, манзара’’, нито’ ила’ саирм’ хамедамбидо’, хибяхартм’ вэваӈэ ни’’ тасламбю’’. Ӈопой мяд’ тердарев’ нята’’. Ӈарка ямдо’ сяӈадо’, лэтрамбидо’.
Сырманзь товы’’ харад’ тер’’, мядонда’’ тэмдорць пирӈадо’. Хурка ӈамгэриком’ сэвтеӈгу’’, тикым’ ӈуда’ терӈэ тэмдаӈгу’’. Манэ’’мандидо’ хуркари’’.
Ӈани’’ паской’’ ӈавори’’ поӈгана хобахат сэдвы’’, я’ хора’’ лэхэт мивы’’ таня’’. «Уникальные мастера России» конкурсхана мэвы’’ мел’ ненэцие’’ манзаи ӈани’ таняна манэ’’лабтамбидо’. Ямал’ терхат сидя Салехард’ тер нерня’ ха’’амвэхэ’. Тикы Семён Севли няби Сергей Аляба. Пыди’ мел’ няхатати’ сямянхат ва’’лёйха’ ӈэвэхэ’.
Автор: Галина Окотэтто’ падвы
Сидяӈг: Марина Ярой’ тадтавы
Авторы
Няръяна Нгэрм
Темы