обновлено: 03:46, 25 августа 2023
Няръяна Ӈэрм
Манзаидо’ манэ’’лабтавы’’
Саляӈгардан’ маӈгты’’ иры’ 9-11 яляха’’на ӈэрм’ тер’’ ма’’лыць. Мел’’ хибяри’’ яна’’ ханярид товыць. Яхадана’’ ӈаха’’на иленасавэй’’ «Душа тундры» фестивальм’ манэ’’ӈаць. Ӈули’’ Россия’ вэкад, Сахалинхад ӈопой не нюта ня’ мядоӈась. Таддикахад Хакасия, Ленинградской область’ тер’’, тамна ӈани’’ яхат ӈэда’’ тикахана мэць. Харто’ теневабцодо’ ваде’’ӈаць, ӈамгэхэв едэян’ пыхыдадо’ тохолаць.
Время для чтения ~ 3 минуты
Нюртей яля’ «Красавица Ямала» пирдырма миӈась. Помнандо’ 15 паской’’ не’’ пирдырӈаць. Ембдяродо’, сэдвы ӈамгэридо’ манэ’’лабтаць. Таддикахад харто’ пыхыдато’, манзаито’ нямна лаханаць. Ной паныдо’, луца сэдыр’’мана сэдвы имбытадодо’ ӈадимдець.
Не’’ поӈгана Екатерина Сэротэтто мэсь. Яр-Саляхад товысь:
- Пыхыдами хорманзь тодамзь. Нюртей тарем’ ядэрмами. Ӈавна’ школахана тохолковани мальӈгана, 1-7 классаха’’на хыно’’ӈадамзь. Андрей Николаевич Няруй сидна’’ тохоламбись. ОЦНК’ сцена’ ниня 5 классахана нудамзь. «Солнце на ладони» пирдырма ӈась. Андрей Николаевич’ ня’ турӈанинзь. Сём’ мэти’’ поӈгана нюртей ян’ ха’’мываць. Теда’ ӈадьбята хар’’н илми сёхона ваде’’ӈавась. Сидна’’ тэвравы — Несэйне Сэротэтто. Ӈобкана тасалкунинзь. Сидяӈгани вадини сер’ тидхалейнинзь, сёни вада’’ тид’’ ха’’морӈаць. Ёльце пэдава’’ не’’ ӈобт’ тэвавыд’’. Мал’’ ӈоб’’ пирас’’ то’’олхаваць.
Пудана яляхана нерня’ хэвыдо’ намдаваць. Няхатати’ ва’’лейха’ Рочева Людмила Овгорт’ тер няби Торопова Прасковья Аксаркахана илена. Нябимдейха’ Алевтина Сегой Самбург’ тер, Валентина Пурунгуй Саляӈгарад’ тер. Няхаромдэйха’ Диана Окотэтто Сёяхад товы, Хэвне Сэротэтто Яр-Саляхана илена не. Сидяӈг: А.Яптик’ тадтавы
Манзаидо’ сэв’’ хамзавыдо’
Ядэрмана’’ сер’ хуркари ӈаво манэпиваць. Пяхад, лэхэд ясьмы’’ ӈамгэри’’, ӈэбт’’, ни’’, ной паны’’. Тазовской район’ няд Надежда Салиндер товысь:
- Невхы тотрев’ паӈгалмы ӈэбтм’ ми’’ӈадамзь. Нини иня’ мара невхы сюдбяко еся. Ты’ сидяӈгасавэй. Ӈэбтани мал, лоӈгэй’’ ӈобтарем’ невхы’’ еся’’. Хар’’н сертабин. Нямэхэна тарана’’ ӈацекы’’ ӈэбтад паӈгалць табадаць. Сидндетм’ сертадамзь. Пуна Москвахана «Сокровища Севера» фестивальхана мэйдонзь. Сямян тэнз манзаям’ пир’’ӈадм’. Тамна ӈодяко паӈгалпидм’. Тюкохона ненэцие ӈуда’ тяхана мэти паӈгалпа тохоламбидм’, сэдвыни мирдапидм’.
Манзаидо’ я’ ханярид ӈэда’’, серм’ теневана’’ манэсармыдо’. Ӈули’’ тяхасовна тэраӈговы’’. Жюри’’ поӈгана Любовь Пуйко мэсь. Пыда Юрибей’ няд ядэрӈа: «Тэраӈгодаӈэ мале сянва’’. Нюртей мэва мел’’ ненэцие’’ сэдвы тэрабидм’. Си’’ми нямэхэна хаӈаць. Таминда тиртя ӈанон’ ӈамдываць. Манзаяна’’ харада я’’авлысь. Сэдвыдо’ ӈули’’ саваць. Хусувэй сэдом’ сомбоковна манэсарӈаваць. Сямян номинацияхана нерня’ еремы, няхатата вата танясь».
Няхар’’ яля мер’ ваера’’. Тикы’’ хавна лаханако ваде’’ӈаць. Сёдо’ хайналабтаць. Хуркари ӈудаха’’на сертавы мирдапиць. Тохолкова’’ таняць. Ӈарка ядэлава’ мюмня ӈобанзер’ ядаць. Ти, нидо’ манэ’’ӈа’’. Ӈани’ похона яӈор’’ ӈобт’ тэваӈгуд’’...
Анна Яптик’ падвы
