Няръяна Ӈэрм
Мел’’ пирибтя
Нюдя пэвдей иры’ нердена ялэ’’ пиркана ӈыхы я’’амна ӈэдалёрӈадамзь. Санкт-Петрбургхана мэдамзь. Таняна ӈэрм’ тер’’ илебей ненэциена’’ тохолку’’. Ӈоб’’ яля танямна ядэрӈадамзь. Лаханакурмана’’ помна няна’’ мел’ ненэцието’ ӈавэ пэрмам’ манэ’’лабтаць.
Время для чтения ~ 3 минуты
Тикадо’ ӈыльняна ӈэвысь. Тохолкодито’ мивэхэт тада музейм’ сертавыць. Харта ӈод’’ таня’ тохолкованзь тодо’’ яхат ӈэрм’ тер’’ турӈа’’. Лэхэт, пяхат мирӈа’’, падтаӈгурӈа’’, сэдора’’, ненэсянда мел’ ӈэвыць. Лохондо’ тер’’ ӈока по’’ ямбан’ ма’’ламбавыдо’. Ненэй ненэця’’ хасава’ ни ненадо’ яхана ӈыдысь. Я’ нямдхад сертавы ӈэвысь. Лата’ ниня ӈоб’’ ӈарка мяд мярысь. Хусувэй хибяндо’ харта маниебцода таня, харта хамедамбида ханзер’’ серта сава. Тикы мел’ ненэцие’’ поӈгана ӈоб’’ пирибтям’ манэ’’ӈадамзь. Нини’ мале танякуй похона торомдэйнинзь. Альбина Яптунэ толь’ тяхана ӈамдё манзаравысь. Пыда сертабаданда нямна сидя сян’ вадам’ мэ’’ӈась:
— Мань хасава ӈацекым’ падтамбидм’. Соя’’ма’ яханани, Ензя’ няна тарця иськабтада’’ сёвтана’’ ӈока ӈэсеты’’. Сертаба пявани мальӈгана ими выӈгана илена’’ нини’’ нямна ядэрӈась. Тарем’ тензебтеб’’нани манзаями хайна минзеты. Тюкона мале няхаромдэй по тохолкудм’. Тадри’, си’’ив яля хэ’’мяхад яхани пяӈгув. Таняна школахана ӈамгэ’ пират манзараӈгудм’. Ӈамгэм’ тохоласадм’, ӈацекэхэ’’ манэ’’лабтамбаӈгун’. Няхар’’ по’ ямбан’ ӈокханда сидя ю’’ ӈухуком’ сертадамзь. Мал’ ӈоб’’ толас’’ ни’’ ӈа’’, хусувэдо’ харта пяныта таня. Ихинани тохолковами сава’ то’’олха. Хусувэй яля’ ӈамгэхэв едэй ӈавэ’’ нямна сидна’’ тохоламбадахат намдорӈава’’. Маня’’ ненэй ненэцяӈэ илма’’ сэдороварихид вуни ӈа’’, ехэрана ӈавэ сертаба ӈани’ тенева тара. Падтамбада хасава ӈацекэцями тюку яля’ ӈока мядондам’ манэ’’ӈа.
Альбина нида выӈгана иле’’. Та’ мяканда нивысь тэвор’’, мята тер’’ ӈыхы явна мюсерӈа’’. Тарем’ ӈод’’ хусувэй та’ хойхана илена няхата мядонзь ена. Тикы нита нямна ибедорць тарця паской ӈухукуда ӈадиберӈа’’.
Автор: Марина Ярой’ падвы
Авторы
Няръяна Нгэрм
Темы