Няръяна Ӈэрм
Таӈы ныланавадо’ пэй’’
Теда’ ӈацекы’’ тохолко малеваридо’ хаи. Интернатхана илена’’ мале мякато’ хая’’. Сиддо’ ханаванзь небянадо’, нисянадо’ турӈаць. Таддикахад ханяӈыдо’ тиртя ӈанохона вынд’ тэвыдаць.
Время для чтения ~ 2 минуты
Интернат’’ мюй’’ ӈарковна терсялма’’. Ӈарка’’ классаха’’на мэнари’’, экзамен падыбавандари’’ хаи’’. Нюдяко’’ някоцидо’ тюку по’ пирувна тохолковамдо’ ёльцедо’ Ӈэрёнда ӈэсонд’ вымна мюсерта’’, нидо’ нядабаӈгу’’. Пон’ нивы манэпавы ӈавкыдо’, вэнекудо’ манзаята’’. Выӈгана нядаӈгода’’ ёльце тарасеты’’. Пыдо’ малкода’’, мюд вадаӈгу’’, танырта’’. Мэвандадандо’ харто’ ӈадиберта’’. Тэхэ’’на илеб’’, серци’’ мэсь я’’маӈгур, нит сер’ етри’ манзара лабцеӈгаӈгун’.
Мядодо’ ӈаха’’на ӈэда ӈацекы тиртя ӈанохо’’на ханабасетыдо’. Тюку по’ ӈобтикы тарем’ тэвабидонзь. Нюдяко’’ хардаха’’ ӈамдорӈаць. Таняд интернатхана илена ӈацекы мякато’ ханабиць. По’ ямбан’ мято’ хэвняна мэвы’’ паромбари ӈамдотана тиртя ӈано’ няна хан’’мы’’. Ӈамгэрито’ ӈэси ня’’амба сюрамбари мимы’’. Сямянхат сава ялярахадо’ ӈэвы.
Сёяхахана манзаранам’ лаханако ня’’ӈадамзь. Ма’’нисяв’’:
— Маниена ӈацекыни мал’’ ӈэдарэян’. Хэвандо’ нерня’ няндо’ табекудамзь: «Мякананда’’ инда’’ ватовна нылэйда’’. Ӈарка няхата’’ инзеледа’’, нядаӈгуда’’. Ӈэрё’ няна сидда’’ тиртя ӈано’ ӈамдолава’ хэвхана ӈани’ ӈатеӈгудм’».
Таняӈы я’ тер фактория’’ ӈэсонд’ тэвравыдо’. Тарем’ ӈод’’ ӈокаюм’ пелядо’ харто’ индо’ сер’ буранаха’’на хэвы’’. Тюку поход хахая илена ӈобтикы ханабавыдо’. Тикы’ нерцюна ӈаха’’на иленаридо’ хан’’лавы’’. Яхады яха, Матюй яха, Тамбей фактория’’ ӈэсонд’ тэвравыдо’. Таняна нидо’ сиддо’ ӈахакуд ӈатевы’’. Ӈацекыдо’ няндо’ тэвра’’махадандо’ падаркана пидте’’мидо’ падыби’’. Пуна тамна’ тяха’ тэхэ’’на, буранаха’’на хан’’ӈа’’.
Сёяха’ няна ты’’ ниць иры’ сидя юдимдей яля’ ӈэсонд’ тирмы’’. Ӈани’’ хардаха’’на ӈацекы яносарка хан’’ла пявыдо’. Таӈэ хэванда сер’ экзамен падыбавы тэваба пяӈгу’’.
Автор: Анна Яптик’ падвы
Авторы
Няръяна Нгэрм
Темы