обновлено: 11:37, 31 августа 2023
Няръяна Ӈэрм
Мирць теневана
Мел’’ ненэцие’’ е’’эмня яна’’ тиӈгэвна сертабададо’ ӈока. Тандая’ пилю’’ иры’ 22-29 яляха’’на Ноябрьск маркана «Легенды Севера» фестиваль юкад вата нюртей’’ яӈорэй’’ миӈась. Мирць теневана’’, пяхад хуркари ӈаво мимба пирта’’ ма’’лыць. Ӈокханда юкад вата си’’ив ненэця’’ Удмуртия’, Якутия’, Московской, Ивановской область’’, Алтайской край’, Хаби’’ я’ тер’’ теневабцодо’ манэ’’лабтамбиць. Маня’’ яхадана’’ таня’ Яр-Саляхана илена — Никита Хороля ӈэдалёрӈась.
Время для чтения ~ 2 минуты
Мале сян яля’ «Нум» нюбета этнографической комплексхана манзараць. Марад сава еркана сихирти’’ нямна ӈэда ӈаво сертабато’ тарась. Никита лахарёда яха’ итрев’ хайнась, ваде’’ман’ харванада ӈокась:
— Тарця пирдырмаха’’ ӈобарка ханцетыдм’. Мирць пэхэваб’’ни ялями ёльце мер’ хэсеты. Теда’ ӈани’ ӈобтикы сер’’. Ноябрьскхана пяхад я’ хора’ сидяӈгм’ мидамзь. Нюрте’’э’ ихинани таслав, пуна падарт’ падтав, тикахавад яӈга хамэдёда пям’ есьӈадм’. Няби’’ нини’’ ӈэдалёда, сихирти’’ сидяӈг мимбиць. Мал’’ варена’’ мэ’’ӈаваць, ӈоб’’ пирсавна ва’’лёйваць.
Тикы нерцю’’ тамна Томскан’ «Праздник топора» фестивалян’ хан’’ӈась. Сидя юр’’ пир’’ ненэця’’ поӈгана сита «Деревянное мастерство» пирдырмахана ненадумдавыць, нянда яӈга ӈуда’ терм’ ми’’мыць. Сертавы манзаяда «Околица» паркхана пилибт’’ ӈэӈгу.
Автор: Анна Яптик’ падвы
