обновлено: 04:06, 01 декабря 2023
Няръяна Ӈэрм
Мяд’ тер’’, ӈацекы’’ е’’эмня ӈэванда по
Тад тованда 2024 по Россия’ ӈэвахана мэна Владимир Путин’ вадавна мяд’ тер’’ е’’эмня таславы ӈэӈгу. Ӈамгэ’ е’’эмня тарем’ сертавада яӈга табекохона пады. Ненэцие’’ и’’ ӈукана невхы похот ила’ паӈгӈэ мято’ тер’’ тарасеты’’. Сямян илебцодо’ таняд пере’’. Мяд’ терсипой’’ ненэця’ сава иланда яӈгу. Тад нерня’ ӈани’ тарем’ ӈэбта тара.
Время для чтения ~ 2 минуты
Ӈадьбята ӈарка пэвдей иры’ 27 яля’ ёльцянд’ яна’’ тиӈгэвна тикы няю’ минреванда серо тидхалембаванда ненэцие тэраӈгу’’. Сян есям’ сад’’мамдо’, ханяд мэ’’манда есьдо’ ханавамдо’, ӈани’ тяхасовна таслаӈгудо’. Ӈэваханандо’ яна’’ ерв’ марцьхы, вице-премьер Татьяна Голикова манзараӈгу, сиддо’ тидхалембаӈгу, серото’ хурка ӈэвам’ маниеӈгу.
Небой похона носиндалава’ ирыхына Владимир Путин тикы серо’’ нямна мале вадамда мэ’’ӈадась. Тамальӈгана пыда Россия’ тиӈгэвна сямянхат ненадоӈэ, таранаӈэ ненэця’ илм’, таӈга, нись тоса мята тер’’ поӈгана илевам’ ваде’’ӈась. Иринана’’ табеко’’ сер’ таӈга илевава’’ — сямян миркат миретя ӈамгэва’’. Тарця’’ вада’’ — нерняӈы илна’’ тидхал’’маӈэ тамна тяха’ мэтына’’.
Ямалханана’’ хусувэй пова’’ ӈани’ ненадумдавы. Ӈобтикы ӈамгэхэв сава серо’’ няю’ минрейна’’. Тюку по’ ӈацекы’’ е’’эмня ӈэванда пом’ ядабтамбаӈгува’’. «Ӈацекы’’ е’’эмня таславы похона ненэцие’’ илам’ савумдамбава’, хабцянзява’ няю’ ӈэда серо минреӈгува’’, тикы’ няю’ нядаӈгодава’’. Округханана’’ хусувэй тетимдей ненэць’ — ӈацекы, хусувэй няхаромдей мяд’ тер’’ — ӈока нюсавэй’’. Мань ихинани, Ямалхана илена’’ нерняӈы иламдо’ теневадо’, ӈамгэхэртахад ни’’ тоса’’, тенева’’: тоенана серкана сиддо’ нива’’ хаеӈгу’’», — Ямал’ нермбэртя Дмитрий Артюхов тованда по’ нямна лаханась. Вадавнанда Россия’ ӈардавна мэ’’манда Мяд’ тер’’ е’’эмня нюмдевы пом’ мэць таславы серо ӈобкана тидхалембаӈгуна’’, Ямалхана ӈацекы’’ иландо’ сава ӈэбта тара, е’’эмнандо’ илева’’, манзарава’’.
Автор: Г.Окотэтто’ падвы
Фото: М.Яр’ тадтавы
