Няръяна Ӈэрм
Мяд’ тер’’ ябда илея’’
Бецко’ мяд’ тер’’ Няръяна Маркана мале ӈахакуй поход иле’’. Нюди’ сава ненэцяӈэ вадавыди’, теда’ нюти’’ ню’’ сидди’ маймбтамби’’. Тет ю’’ сидя по’’ тяхана Татьяна Павловна, Николай Иванович ниди’ ядабтавыдинзь. Тедалахана хусувэй серкана ниди’ нядаба иламди’ нерня’ минреди’.
Время для чтения ~ 4 минуты
Неняӈг’’ ирий’ сидндетимдей яляхана мяд’ тер’’ хэбидя яляӈэ таславы. Тикы яляхана ӈобкана ӈока’’ по’’ ямбан’ илена ненадумдабасеты’’. Ӈока’’ хибяри’’ поӈгана медальм’ Татьяна Павловна, Николай Иванович Бецко ня’’амӈаханзь. Пыди’ ӈобкана тет ю’’ сидя по’’ илеӈаха’, самляӈг нюмди’, хасую’’ нюти’ ню вадаӈаханзь. Пухуцяюм’ Искатель’ ӈэсыхына сёбар’’ ненэцие’’ хардахана манзара. Вэсакоюм’ водитель ӈэвысь. Теда’ пенсияхана мэ, тарем’ ӈод’’ ӈопой яхана хасена ехэра, пили’’ пэртядамда хосеты: ханесеты, ёрцеты.
Татьяна Нюдя я’ тер, школамда ёльце’’махаданда Саляӈгардан’ ӈэдалавыць, лекараӈэ тохолкурти’’ училищехана тоходанась. Пуна фельдшерӈэ тарась.
— 1978 похона яхани тодамзь. Округхадана’’ тоходанадамзь, ӈадьбята си’’ми мале ӈатевыць. Нерде’ Каратайкахана вымна ӈэдалёрта лекараӈэ таралъяваць. Мань хой’ илм’ теневанаӈэ таня’ хаядамзь, ивняни ӈась. Сян ирий’ ямбан’ ӈэдалёрӈадамзь. — нюртей по’ манзаравамда Татьяна ваде’’ӈада. — Ӈарка яхана мюсерта’’ ненэця’’ нисяв’, небяв’ теневана’’ нини’’ ӈэвыць, ӈани’ мер’ торомдэйнась. Хаӈгурта мяканани савумдамбасетыдм’. Хой’ няна хуркари’’ хабця’’ ӈадиберцеты’’.
Харе’’ серо’’ни поӈгана мякана нядаӈгосетыдм’. Тикыда тамна сава ӈэвыкы, саць саӈговоць хаӈгурта’’ тамальӈгана яӈгуць. Тоходанван’ мальӈгана ӈока ӈамгэм’ тохоладамзь, практика’ мальӈгана ӈамгэхэвм’ ехэраб’’нан’ хонаркосетыдм’, сяхаринда ханзер’’ мэсь сава ӈэвамда табедасеты’’. Манзара пяб’’ни тарцям’ хамададамзь — ӈамгэхэрт пилюць ни тара’’, нерняри’ минзь серо’’ӈа. Сеяр ниб’’нанда пин’’, серод тид’’ минда’’.
Каратайка’ няна манзараван’ ямбан’ саць харе’’ мякан’ хэван’ харвасетыдм’, сеюв мякан’ нярканасеты. Хардахадан’ юне ӈатесетыдм’, нини’’ паднасеты’’. Ӈобаӈгуна юн то, маня’’ Варандэйханана’’ лекарава’’ яӈгу. Тарцям’ намда таминда падарм’ пададамзь. Тикы’ пуд си’’ми таня’ ӈэдараць. Хар’’н ӈэсыхын’ тоб’’нан’ нини’’ си’’ми маймба ядабтаць, фельдшерӈэ тарадамзь. Сидя ю’’ сидя по’’ ямбан’ ненэцие савумдабидамзь. Тамальӈгана манзаина’’ хар’’на’’ пэрцетына’’ — лекар’’ мя’’ма’’ сулорпасетыва’’, хорм’ тодаламбасетыва’’, итава’’ тэврасетыва’’. Нина’’ нядаба илесетыва’’.
Тамальӈгы’’ похо’’на’’ Варандэйхана Николай Бецко службамда минревысь. 1982 по’ сие’’ ниць ирийхана тюнди’ ваерась, ӈобт’ илелъяханзь. Самляӈг нюди’ таняна соявы. Тальцюна мято’ тер’’ Няръяна март’ илеванзь тэвыдаць. Тюкохона Татьяна вэсаконда ня мэёвна илелъяханзь. Нюди’ вадаӈаханзь, тохолаӈаханзь. Ӈацекыди’ мале харто’ мяд’ терсавэй’’. Теда’ Бецко таӈга илеӈаха’, нюто’ ня’ ӈобкана ныланасеты’’, нюти’ ню поӈгарманзь, пэдаран’ ядэласетыди’, тудако, ӈоди ма’’лабсеты’’.
– Мани’ мя’’ни’’ тер’’ ӈока’’, сававна илева нянани’ сямянхат тарана. Ил’ сибё ни ӈа’’, ӈобкана хусувэй сер’’ пирдалева’ пир’’. — Николай тарем’ тасламбида.
Тарем’ Няръяна маркана Бецко’ мяд’ тер’’ иле’’. Ӈобкана пыдо’ ябда’’!
Автор: Юлия Талеева’ падвы
Авторы
Няръяна Нгэрм
Темы