Няръяна Ӈэрм
Мядоманзь хан’’мы’’
Округна’’ школаха’’на тохолкода’’ хуркари’’ мэкад’’ манзаи манэ’’манзь ядэрцеты’’. Саляӈгардахана Обдорской гимназия’ ӈацекы’’ падро падтамбава хардан’ — типографиян’ хан’’ӈаць.
Время для чтения ~ 3 минуты
Тарця юнм’ намда мань ӈани’ таня’ хаядамзь. Ӈацекы’’ мале типография’ лохо’ мюня ма’’лёвыць. Луци нендо’ ня ӈамгэхэвм’ тасламбиць. Тохолкодако’’ маямба сиддо’ тохоламбадамдо’ паромламбиць. Мер’ хусувэй ӈамгэм’ намдаван’ харвана’’ то’’олхаць. Поӈганандо’ сидя ненэй хасава ӈацекэхэ’ танявэхэ’. Таӈгарка нуӈаханзь. Ненэй вадавна лаханакурӈаханзь. Ӈамгэ’ е’’эмня товамдо’ няданди’ хонрадамзь. Хэвханани хахая мэвы тарем’ лаханась:
— Мань нюмами — Ярослав, еркарами — Ӈокдэта. Нябимдей классахана мэдм’. Тюкона газета, журнал сертабавамдо’ манэ’’лабтамбаӈгу’’. Тедари’ нив хамедамбю’’, ханзер’’ падтамбадакыдо’. Ехэрана манзаям’ манэ’’мами нянани нюрцям’ ӈэӈгу.
Пуна сиддо’ ядэлана луци не тось, лаханако нями сававна инзелеванзь, паромбарка нита понд’ нулъяць.
Ӈацекэхэ’’ типография ӈамгэхэна таравам’, хибя’’ тикахана манзаравам’ ваде’’ӈаць. Хусувэй ӈамгэ танявам’ намдаваць. Тарем’ яднахана’’ ӈарка лохон’ тюваць. Мюнянда газета ханзер’’ сертабавам’ манэ’’лабтамбиць. Хуркари’’ кнопкахат тидхалембада’’ еся’’ мутрыдо’ танявы’’. Нюрте’’э’ ӈарка’’я лабтэйраха’ мюмня халбуйӈэ сертавы падарм’ ӈолепяхана падтаванзь пакледонзь. Тикы падар’’ яӈорэйӈэ паромба сюра миӈась. Тад пуна мюданда наӈэдя’’, падвы’’ газет’’ ӈадиберӈаць. Книга, тамна ӈани’’ падна’’ тарана’’ падро сертаба мэтадо’ харта яхана ӈэвысь. Таняна тарця манзаям’ теневана’’ ненэця’’ манзара’’.
Падтавы’’ падродо’ ӈобт’ ма’’ламбидонзь. Падро’’ мандалм’ тет яӈотаӈэ тодо яха’’ ерпидонзь. Книга’ хобам’ сертабавам’ ӈани’ таславаць. Харад’’ ядха’’на ӈыдабада плакат падтамба мэтадо’ яӈга танявысь. Ӈацекы’’ ехэрана манзаям’ мание сэвридо’ мэ’’ӈаць. Тэри пысаӈгаць. Хонравандадо ӈокась. Хэвандо’ нерня ӈудандо’ терад ня’’маць. Ембтавандо’ сер’ нябиюм’ ненэй ӈацекым’ ӈани’ хонравась. Пыда тарем’ лаханась:
— Мань нюмами — Тусида Илья. Тюкона ехэрана ӈавэ манэ’’ӈадамзь. Ёльце нюрцям’ ӈэвы. Мяканани нисяхани’-нябяхани’ вадетав. Нюдяко блокнот сертабиваць. Тикына’’ нянана’’ ханаӈгуна’’. Паднабцие ня’’маваць. Тэри хумбанзяда’’ ни’’ ӈа’’. Хусувэна’’ харта нюмда пады. Тюку ялями пон’ тенеӈгув. Ӈули’’ маямбидм’, мядонзэйӈэ газетадва’’ таць.
Илья лаханакуро’’махаданда нита пумна пин’ тарпыць.
Саляӈгардаханана’’ манэ’’манда мэлва тамна ӈока. Тохолкоди’’ е’’эмня хуркари’’ ядэръя ӈадимдемби’’.
Автор: Руфина Окотэтто’ падвы
Авторы
Няръяна Нгэрм
Темы