Няръяна Ӈэрм
Мядондава’’ турӈась
Редакцияхана’’ тюӈганина’’ ӈобарка танясеты’’. Турта няха’’на маня’’ ӈули’’ маймбасетыва’’. Вадета’’ лахарюдо’ саць сава’’ ӈэсеты’’, сидна’’ тэри маймламбасеты’’. Ӈамгэхэв едэй юнам’, ӈани’’ яхана’’ ненэцие’’ ханзер’’ илевам’ намдаӈгун. Ява’’ ӈарка ӈэ’’нив’’, ӈа’’иха’’ вунива’’ тэвор’’.
Время для чтения ~ 2 минуты
Хубта яхад товы ненэця’ няндеркав тамна ханя’ сава ӈа’’. Тандая’ редакцияхана’’ Ӈарка я’ няд ненадо мядондава’’ тюӈгась. Няръяна-Мар’ няд Юлия Талеева тось. Пыда «Няръяна Ӈэрм» газетаханана’’ янда тер’’ нямна падна.
Сяхаӈгав’ ты’’ ниць иры’ 1997 поход сие’’ ниць иры’ 2006 по’ ӈэсонд’ Саляӈгардахана илесь. Радио’, телевидения’ манзаям’ пэрӈась. Округна’’ ӈэсы’’мана етри’ ӈэдалёрӈась, выӈгана илена лаханакурць ня’’мысь. Тедалахана’ тикы серта тамна маймба минреда. Харта яхананда газетахана падна. Таддикахад радиохона манзара, ненэй вадавна ӈэда лахарём’ минре.
— Мань небо’ хусувэй ирыхына ӈэдалёрӈадамзь, ӈока харадм’ манэ’’ӈадамзь. Хой’ няна соявы ненэцядм’, ӈоб’’ ӈопой яхана мэсь я’’мав, етри’ мюсеван’ харванархадм’ ӈэсетыдм’. Теда’ Саляӈгардан’ ӈани’ тэвыв’’. Тюкохона сава нини мэ’’, лаханако ня’’мандини, падыбавандини ӈобтарем’ таня’’. Хусувэй по’ Ямалан’ тэворцетыдм’. Тюкон’ турць харвабцоми ёльце ӈарка ӈэсеты.
Юлия Алексеевна ма’’нисяв’’, пыдара’’ ӈод’’ ӈани’ турӈада’’. Тиртя ӈанохона, еся сехэрэвна Няръяна-Март’ тэва пир’’ӈава’’. Ненэся ӈамгэхэв хэбидя ялям’ едеп’’ сава. Нара’ няна «Сямянхат мэбета» нюбита пирдырмадо’ ӈэванда. Нельмин-Нос хардахана «Варӈэ’ ялям’» мэ’’манда’’.
Автор: Анна Яптик’ падвы
Авторы
Няръяна Нгэрм
Темы