Няръяна Ӈэрм
Мяканд’ тутава’’
Сяхаринда ханярина соявы, вадёвы ӈэбата’’, техэ паӈгара’’ мэбепата, сидта’’ тарем’ ӈод’’ нэкалпаӈгу. Хусувэй по’ ӈарвоманда’’ сер’ инда’’ ӈу’’ таняри’ сата’’. Тарем’ ӈавна ӈарка ненэця’’ манзеты’’. Ненэсянда ӈод’’ тарця ӈэвы.
Время для чтения ~ 4 минуты
Пудана по’’ ӈарка харад’’ ядхана ея мядо мярыбада’’ ӈокма’’. Пыдо’ манзаяхатато’ нылана таня’ ядэрӈа’’. Ӈани’’ тамна ехэрана’’ несэй’’ серо минре’’ — мядондаха’’ ӈэрм’ тер’’ илам’ манэ’’лабтамби’’. Тикамдо’ мирӈэ мэ’’ӈадо’. Тикахана ӈамгэхэрт вэвада яӈгу, ханяцей’ ӈока хибярихи’’ харе’’ иландо’ саирм’ манэ’’лабтамби’’.
Тасу’ яв’ няна Хальмер’’ Седе’ хэвхана тарця’’ мяд’’ мале танякуна ӈани’ ӈадимяць. Таняна ненэй ненэця’’ мэ’’, пыдо’ мядонди манзая’’ӈа’’. Ӈоб’’ ӈарка мя’’ Яндо Илья Васильевич’ мяд’ тер’’ мярвы. Пухуцянда ня ӈэсыди’ ӈыхы ян’ ӈади. Светлана Андреевна минрена серти’ тарем’ ваде’’ӈадась.
— Мань мале пон бухгалтерӈэ манзарадамзь, тарем’ ӈод’’ выӈгана соявы, вадёвы ӈэсь ими пили’’ вынд’ ӈась. Янамбовна вэсакони ня тарана иӈут’ ха’’мынинзь, невхы илни саирм’ нерня’ ӈобкана минре пянинзь. Самляӈг по’ тяхана нерде’ мя’’ма’’ хар’’на’’ мэ’’мана’’ е’’эмня палӈаваць. Ӈыхы яхана ӈэвна’’ сибемя’’, нина’’ ядабтамбавана’’ няю’ ӈэсым’ сертаваць. Небо’ пявы манзаями несэйвана минре тасламинзь. Мядондина’’ таня’ ма’’ламбива’’, поӈганандо’ ханяӈыдо’ сяхаӈгарт’ ненэй мякана мэвдавэй’’. Хальмер’’ Седе хардахана илена’’ поӈгартаха’’на тарця’’ танявы’’. Ӈэсыва’’ Тазовской хардахад луца’’ няхар’’ ӈэдалава’ пиркана ӈа. Та’ хибяри’’ яда тэворць пирӈадо’. Сыра’ мядонда’’ ханяӈэхэна еся ханхана тэврамбина’’. Ненэциена’’ тэри ӈаворць ни’’ тур’’, пыдо’ хой’ иланд’ харто’ тоходана’’. Не’’ манзаи сертаба, тум’ пята, корм’ саба, харвобта сэдора хорпидо’. Хасава’’ ӈэбато’, пихиня хасев няханато’ мэсеты’’, мирта ненэцяӈгад тохолкосеты’’. Тарем’ няндо’ илна’’ саирм’ тамна тяха’ тэврамбива’’.
Тарабата ханзер’’ выӈгана, тэхэна илевава’’ ваде’’ӈава’’. Сяхари’ мякана’’ турць пиртара’’, ненэйвана мяд’ мюня сенаси’’, харад’ ила’ хумнахад нылаӈгуда’’. Ненэцие ненэй ӈаврахана ӈавламбина’’. Халя’’, ӈаябад’’, пиревы ӈамза’’, ӈодя’’ танясеты’’. Мядонда’’ ёльце харвобтэйдо’. Луца’’ хуркари мэкад ӈавэ хонрамбасеты’’, неноховавна хойхана ханзер’’ матвава’’ намдаван’ харвасеты’’. Тяхасовна вадецетына’’. Ӈока хибя’’ илам’ торомдаванзь, ӈани’’ тэри ныланаванзь турцеты’’. Тарем’ мядм’ мяраб’’, тикамд хусувэй яля’ манэ’’сартар, хад’ пуд яӈгатар, хэвхэмда сырахад сираӈгур. Та’ — ӈу’ тэс’’ танясеты’’, мянувнандо’ ӈани’ мая’ ӈэсеты’’.
Маня’’ ӈод’’ хар’’на’’ мяканана’’ илна’’ саирм’ нёдава’’. Мядондина’’ хэ’’мяхад мяна’’ мюйм’ нибтрамбасетыва’’. Тодо’’ яхат турта’’ ненэця’’ хуркари’’ ӈэ’’ним’’. Иӈуканандо’ ӈамгэ’’ ӈэдакы’’, маси’’ ся’’мэй’’ ё’’ нямна ядэрмакы’’. Тикы’’ серона’’ етри’ минрейна’’. Хойхад нина’’ ӈани’ турцеты’’. Яханана’’ сыв’ ненэциена балок мэ’’ӈа’’, ӈадьбята ненэй мят’ тюӈгава нянандо’ мале нюрцям’.
Тарем’ ненэцие мядолава’ няю’ теда’ округханана’’ хуркари’’ тарана’’ тохолкова сертаби’’. Тадӈо’’ ӈэрм’ тер’’ илам’ манэ’’ман’ харвана’’ ӈока’’. Тарця’’ ненэцяӈга’’на маня’’ илма’’ мэкад, няндо’ ӈока ӈамгэм’ манэ’’лабта, вадець сава. Небо’ сельбя’ няна Новой Уренгойхана тохолкуваць, намдавына’’ манзаяханана’’ няд’’ма’’ ӈэвыць.
Тадри’ тамна ӈопой мядм’ мярван’ харвава’’. Ненэця’’ ӈока ӈэб’’, хутолараӈгасетыва’’. Ненэцяндами-нядаӈгодадами ханаӈгудм’, ӈопойриӈэ сидя мяд’ сер’ санарць тоена. Теда’ ханяӈэхэна не нюми, небями нядаӈгосетыхы’.
Илья Васильевич, Светлана Андреевна саць тарана манзаям’ минреӈаха’. Сяхаринда ӈэсынди’ ӈэсонд’ ӈэда сехэрэди’ нёя тохоӈг’’. Мяк’’ туртиди’’ тамна сававна ненэй ненэцяӈэ илма’’ тохоламдо’.
Марина Ярой’ падвы
Авторы
Няръяна Нгэрм
Темы