обновлено: 09:52, 09 июня 2023
Няръяна Ӈэрм
Мякандо’ ӈэдалавыд’’
Округна’’ школаха’’на по’ ямбан’ тохолковы’’ ӈацекы’’ ныланаванзь тарпыдаць. Маркад мякандо’ сидто’ тирта ханхана тэволыдонзь.
Время для чтения ~ 3 минуты
Ӈокханда сян’ яля’ ямбан’ няхар’’ юркад вата тоходани ӈэсыхы’’, хоян’ тэвраць. «Ижемский оленевод и Ко», «Харп», «Ерв» СПКахана тыбэртя’’ ненэця’’ нюдо’ нерде’ маркад Красной ӈэсын’ тэвыдаць. Мале таняд ныланаванзь нисянато’, небянато’ мят’ хоян’ танаӈгуд’’. Хойхана няхар’’ ирий’ ямбан’ варемдо’ мэць ныланаӈгу’’, ныхыто’ пирувна ӈарка нидо’ нядабаӈгу’’.
Маркана тоходанавы’’ ӈацекы’’ ты’’ ниць ирий’ сидя ю’’ нертей толыркана Каратайкан’, Хорей-Веран’, Харута’ няна мюсертаха’’ тирта ханха’’на ӈани’ тэворӈаць. Яля’ ер’ пуд Хорейверкад ӈацекы’’ хоян’ тэвыдаць. Таняна илена’’ нидо’ сиддо’ маймбась ядабтамбиць.
Тюку яля’’ пиркана тирта ӈано’’ Варнекан’, Усть-Каран’, тамна ӈани’ ӈэсыхы’’ тэворӈаць.
Хардахана илена’’ тэри тарем’ ныланавамдо’ нидо’ мэт’’, ханяӈыдо’ манзараӈгу’’, ӈанидо’ лагерьт’ ядэрта’’.
Бугринохона «Канин» община’ тер’’ ты пэртя’’ ню’’ хоян’ хахаяда яляхана тэвыдаць. Сямянхат пуданаӈэ каникулка’’ Нельмин’ Саля ӈацекы’’ хаяць. Нюдя яхана тыдо’ пэртя’’ ненэця’’ нюдо’ хахаяда яляха’’на мят’ ӈэдалаӈгуд’’.
«Хусувэй по’ маркана тохолкурти тирта ханхана мякандо’ тэво’’ласетына’’. Тюку по’ ӈани’’ тарцясь. Ӈацекы мал’’ нисянато’, небянато’ хэван’ тэврэйнаць. Таӈы ямбан’ варемдо’ мэць ныланаӈгу’’, ныхыдамдо’ ма’’лабаӈгу’’, нядаӈгода’’», — сиддо’ тохоламбада ӈарка нядо’ Елена Сметанина вадамда мэ’’ӈась.
Тев’ ёльцяӈгана выӈгана манзая’’ тянё ни’’ ӈа’’. Хасава ӈацекы’’ нисянато’ хэвхана тыдо’ мание’’, не ӈацекы’’ — небянато’ сава нядаӈгода’’.
Тарця тирта ханхана 11 классм’ ёльцебади ӈэсыхыт Нярьяна март’ ЕГЭ падуванзь тэврэйдонзь. Округна’’ ерв’ ӈуда’ ӈылы Наталия Сидорова’ вадавна, тохолкова’ по’ пуданахана март’ сидя си’’ив школамдо’ ёльцебада’’ тэвыдаць. Пыдо’ маркана ненэцие’’ школа’ интернатхана иле’’. Ӈаволавадо’, ныланава’ лоходо’ таня’’. Е’’эмняндо’ хусувэй ӈамгэм’ хамадавы’’. Экзаменка’’ хамекованзь’ яӈга кабинетхана ма’’люрта’’, тараб’’нанда консультацияха’’ ядэрта’’. Ныланавадо’ ӈани’ таславы, кинон’ ядэлаӈгудо’, экскурсияха’’ тэворта’’.
Ю.Талеева’ падвы
