Няръяна Ӈэрм
Мюсерта’’ ненэцие’’ е’’эмня
Россия’ тиӈгэвна ненэця’’ ханярина илебто’ ӈод’’ мал’ Конституция’ вато’’ сер’ иле’’. Таняд таӈга, нись тоса илевава’’ паӈгды. Тарем’ хусувэй яна’’ тер’’ индо’ харвабцовна ханяримна ӈэдалёрць ватодо’ таня. Илесь ядамдо’ ӈани’ харто’ тэраби’’.
Время для чтения ~ 2 минуты
Ӈока яна’’ тер’’ хардаха’’на иле’’. Тодо’’ ё’’ няна пэдарахана, выӈгана илена’’ ӈани’ таня’’. Пыдо’ иринато’ невхы илам’ мэ’’ӈа’’. Закон’ сер’ мюсертаӈэ, нядэнаӈэ толы’’. Толырманандо’ тикы’’ 262,6 ёнар’’ ненэця’’.
Маня’’ Ямалханана’’ ненэй ненэцяӈэ невхы похот тарем’ илева’’. Едэй илаӈгана тэхэ’’нато’ мэна’’, халям’ хадабада’’ невхы иландо’ саирм’ нёда’’. Яна’’ тиӈгывна е’’эмнандо’ хуркари’’ няд’’ми ӈадимдемби’’. Тикыдо’ ня’’амвандо’ няю’ яӈга падар’’ тарасеты. Тикахана мюсерта ненэцяӈэ толёвадо’ пады. Тарця падарм’ ненэця’’ тодо ервхат хонрамбасетыдо’. Ханяӈэхэна тамна сит ӈопой ервхад тамна тяха’ ӈэдабтаӈгу’’.
Теда’ Россия’ ӈэвахы нермбэртя’ табековна тикы падро’’ нямна закон’ ватом’ хаця яӈгамдавэдо’. Вадавнато’, тарем’ ненэцие падродо’ ма’’ламба нядаӈгу’’. Ненэця’ ненэся мюсерць илеванда нямна ӈэда падарта таславы ервхат хонрамбаӈгуда.
Ямална’’ тер’’ мюсертаӈэ ӈэвамдо’ «Госуслуги» няд’’мяць тасла пирӈадо’. Таняд харто’ тарана падарто’ нэкалць пирӈа’’. Ханяхарт ядэрць ни тара’’ яланда ӈуданд ӈылна телефонар таняя. Мякаданд падрод харт сертаӈгуд.
Автор: Галина Окотэтто’ падвы
Авторы
Няръяна Нгэрм
Темы