Няръяна Ӈэрм
Москвахана теневадо’
Ненэй вадавна ӈока нита нерняд лаханаком’ иле’’мядрев’ таӈга манэ’’лабтамбидась. Пудана вадамда хэт’’махаданда нянда сырта’’ ненэця’’ пеедо’ пон’ тоебидонзь. Тикы 9 потна Станислав Евай, Хальмер’’ Седе’ тер. Ӈока ненэцие’’ поӈгад Алиса Дмитриевна Неркахы ӈацекы хэтуванда вади хасабарць хэтыбидась. Ехэрана ненэцяӈгана Станислав хэтакуртарахась.
Время для чтения ~ 2 минуты
Тикы няхаюна’’ Москвахана тодо’’ яха’’на илена’’ ӈэрм’ тер’’ «Сокровище Севера» ярмарка-выставкахана ненэй вадавна лаханаку ваде’’ӈаханзь. Алиса Дмитриевна, ӈацекым’ тохоламбада тарем’ мась:
— Мани’ няхар’’ лаханаком’ манэ’’лабтанинзь. Евай Станислав тидхалембада 19 ӈацекыни’’ поӈгад сямянхат сававна ненэй вадавна лахана. Харта ӈод’’ нисяда вы’ тер, ӈадьбята таборци’’ харе’’ вадавнанда нюда лахана. Сыв’ школаханана’’ фестивальм’ мэ’’ӈаваць. Таняна ва’’лёй ӈэвава’’ хамедадонзь, ӈарка ян’ сидна’’ Мария Аркадьевна Веникова, ӈарка ервава’’ хаӈась. Ихинани’ мани’ Москван’ тэвормами’ саць ненадо серӈэ тасламбив. Хаёвы нини’’ теневаӈгу’’: «Ненэй вадам’ мэ’’ма, теневава ӈани’ тарана сер’’ ӈэвы». Няхандо’ сыраць пыдо’ ӈани’ варемдо’ мэта’’. Станислав сяхаринда ӈамгэрим’ пяб’’нанда ӈули’’ тяхасовна пэрцетыда. Теда’ яхани’ тэв’’махадани’ тамна варева’’ мэ’’лаӈгува’’.
Алиса Дмитриевна Тасу’ явхана вы’ тер’’ ню интернатхана тидхалемби. Ӈацекыта ня’ кружокхананда лаханако манэ’’лабтамби’’. Ма’’нисяв: «Тарем’ ӈока ненэцие’’ нерад лаханава тюку илаӈгана ӈани’ саць тарана сер’’, теневабцохона ненэцям’ нядабида. Лахана пирта, тохолкурпата ни сядоларёд’’. Ихинани маня’’ ӈобкана саць ненадо манзаям’ минрева’’».
Автор: Марина Яр’ падвы
Авторы
Няръяна Нгэрм
Темы