обновлено: 06:24, 25 августа 2023
Няръяна Ӈэрм
Мунота сянако сертаби
Нямэхэна я’ ханярина ӈарка ялява’’ мэ’’ӈаваць. Ямидхы’’ похот харто’ яха’’нато’ илени’’ яля ӈась. Саляӈгарад’ тер’’ ӈобтарем’ ма’’люрӈаць. Тамальӈгана ядэрмани сер’ манэтами ӈокась.
Время для чтения ~ 2 минуты
Танцие’’ ни’ тантадм’, лакри’ ӈамгэхэв муно намдадм’, тэри сомбовна сованондо’. Муно’’ няю’ ӈэни паромбарка яда’’. Толь’ тяхана сидя ӈамдёдам’ манэ’’ӈадм’. Ӈопой — хасава ӈацекы ӈэвы, нябиюм’ — Евгений Варьевич Худи. Варемди’ мэць мунота сянакорха тайналтамбихи’. Тольнди’ ниня хуркари’’ мэкад’’ ӈамгэ’’ танявы’’.
Евгений Варьевичхад хонаркудамзь: «Тюкохона ӈаво ваде’’ӈан, манэ’’лабтамбин?» Яр-Саля’ тер нява’’ тарем’ лаханась:
— Мань пяхат, нямдахат «музыкальной инструмент» сертадамзь. Тюкоми лулко. Ӈавнанда хой’ няна пихина мэна ӈока ӈэсеты. Вараӈгад, вэнекон’ ниня намдорта ты’’ нямдаха’’ лулко сярабасеты’’. Сидя нямдахаюта понд’ нямд’’ пелякаха’’на теревы латам’ сярсеты’’. Ты хадырма’ ёльцяӈгана ӈоб’’ мунота, пихина мэнам’ вэнолабтамбаӈгу. Сянакоми тэва ямб сидяӈг тотрев’ мивась.
Пад’ мюня тоба’’, нямдкоця’’ ӈэвы’’, мал’’ сомбовна сидермы’’. Лаханако нями тарабцомдо’ вадець пя:
— Нюртейни то’’олха, понда сисавэй. Ты’ тобаха’’на ӈыдавы. Тоба’’ ӈобт’ тебермандо’ сер’ я’’авла муно’’ӈа’’. Тереся помнанда ӈыдаб’’, мунда ӈани’ несэй ӈэӈгу. Тамна ӈопойм’ пэя’’мадрев’ сертавась. Сидя’’ няд иняхана сяравась, тикавна нямд’ пелякоци ӈэдарадамзь. Тикы’ хавна нюдяко пензеро тэврадамзь.
Ӈацекы’’ хэвханда тэри ма’’люрӈаць. Хусувэдо’ сянако муно’’лабтамбаван’, серта хор’’ман’ харвась. Мивы’’ ӈамгэрида сяхари’ сёётэй’’ ненэцяӈга’’на тара пиртадо’, сёто’ сахамла’’ма’’ ӈэӈгу’’. Ти, Евгений Варьевич нянда’’ торовам’ ӈэдарамби:
— Ямал’ тер’’, нёда’’ хаӈгур’’, нюда’’ сававна тохолкоя’’, илра’’ сава ӈэя. Ты пэртя’’ тыдо’ едясяя’’. Халям’ хадабада’’ поӈгадо’ пан’’ӈая’’.
Автор: Анна Яптик’ падвы
