Няръяна Ӈэрм
Илебей’’ учёной’’ тасалкова
Ханты-Мансийск хардахана «Молодежная Арктика: наука для будущего» конференция ӈась. Россияна’’ тодо’’ яхат ӈэда илебей учёной’’ ӈобт’ тэвыдаць. Ӈани’’ яхат ӈобтикы товы’’ танявыць.
Время для чтения ~ 2 минуты
Ханярина ӈэрм ям’ ненадо яӈэ тасламбидо’. Ӈадьбята сабе тохоламбидо’. Теда’ таняна ваде’’мыдо’ хуркари’’ сер’’ ӈэвы’’. Ненадовна я’ сяр’ нийм’, я’ сэрерм’, яна’’ ядемдана пэвам’ ваде’’мы’’. Ханяӈы’’ проектадо’ ила’ саирм’ лэтрава’ нямна ӈэвы’’. Тарця ма’’люрма ёльце тарана сер’’. Нидо’ лаханако ня’’ӈа’’, ӈобанзер’’ едэй и’ ядэрабцо хомби’’.
Ма’’лёвы’’ поӈгана Салехардахана илена Нечей Сэротэтто мэвы, тарем’ лахана:
— Мань ӈэрм’ тер’’ ӈацекы’’ ненэцие’’ серо, ханярина пыхыдадо’ тохоламба пир’’мамдо’ ваде’’ӈадамзь. Тюку илаӈгана сямян форумха’’, тамна ӈани’’ ханяри ханаць пир’’ӈава’’. Тохолко пэвани мальӈгана тарця яӈгусь. Пуна етри’ ӈадиберць пэйдаць. Теда’ хой’ няна мэнахарт тарем’ ӈэдалёрць пир’’ӈада, харта харвабцорихиданда ӈа. Таддикахад ханяӈы’’ илебей ненэциена’’ Северной Форумхад перена советан’ пыхыдадо’ падыдонзь. Тикы я’ тиӈгывна илена’’ тодо’’ тэнз’’ ненэцие’’ организация. Ненадовна Ӈэрм’ я’ нямна ӈэда серо тасламби’’. Си’’ми ӈобтикы таня’ хаӈаць.
Таддикахад таняна мэванда сер’ учёной нем’ лаханако ня’’мы. Пыда я’ сэрерм’ тохоламби. Яӈга я’ манэсарць мэта’’ мутрыдо’ танянарха’’. Ханзеркав’ я’ ӈыл’ ӈэдарамбидо’. Я’ ютерм’ тюхулпи’’. Пуна тикыдо’ микроскоп няд’’мяць манэсаръядо’. Мамы ӈэ’’нив’’, хусувэй по’ яна’’ сэрер’’ янамбоковна юна.
Автор: А.Яптик’ падвы
Авторы
Няръяна Нгэрм
Темы