Няръяна Ӈэрм
Ненадо нява’’
Теневана нини’’ сер’ ӈоб’’ сава ненэцям’ ядабтадамзь. Нюмда Матвей Лаптандер. Илебей ненэць’, Пэ’’ няд ӈа. Ӈавнанда Белоярскхана хасава ю’’ классм’ малевысь. Тикы’ тальняю’ Саляӈгардахана колледжхана няхар’’ по’ ямбан’ ненэцие’’ няю’ тарана манзаям’, закон’’ серо’’, ням’ тосакабтёда’’ серкат нядабавам’ тохоламбвысь. Иле’’мида тензебтемба тохолкоб’’нанда тэри нивы мы’’.
Время для чтения ~ 3 минуты
Манзаита хавна ӈэрм’ тер’’ сянакубц’’ секцияха’’ хан’’мысь. Нюртей пирдыро’’мида Яр-Саляхана ӈэвыць. Таняд ням’ нертембавам’ нюрцямӈэ таславыдась. Хуркари’’ чемпионатхана мэвысь, Россия’ пирувна тэвормысь. Тарем’ ваде’’ӈадась:
— Нердена ӈэдалёро’’мами тарцясь, тёняӈы Дудинка март’ хан’’ӈаваць. Си’’ив Харв маркад поездхана Москван’ хаяваць, пуна тамна’ тяха’ мерета тиртя ӈанохона пяваць. Тикы нюрцям’ манэсо’’махадани ӈэрм’ тер’’ сёбар’’ сянакубц’’ ини ядан’ ӈэда манзаядани мэ’’лынась. Пирдырмахана пухуцями ходамзь. Тохолковани’ ямбан’ нини’’ ӈоб’’ хомбасетыни’, ядэрцетыни’. Теда’ хасава нюми’ таня. Етри’ нюми няць ӈэдалёрцетыни’.
Тохолко мале’’мяхадани тет по манзарадамзь. Таддикахавахад солдатӈэ си’’ми ядембада яха’’ ханаць. Тикахана мэвани сер’ ӈани’ хуркари’’ тэнз’’ сянакубцха’’ ядэрӈадмзь. Ханяӈэхэна волейбол ӈэсеты, ӈанихина — баскетбол. Баскетболхавм’ ӈахат теневаркав, си’’ми ӈани’ ханаць. Та’ мальӈгана округ’ тиӈгывна нюртей ян’ ха’’мынаць. Пуна сидна’’ тамна’ тяха’ ӈэдараць. Южной Военной округ’ чемпионатхана нюртеяваць. Таремгав’ футболхана теневадм’, Самара маркана пирдырӈаваць. Ехэрана сянакубцм’ торомдадамзь. Ӈобтикы футболм’ нюбе’’ӈа, ӈопой’’, ӈудаха’’на мэта, ӈарвэй’ малхана тапарпада ни ӈа’’. Етя нюмсавэй — Американской футбол. Чемпионат’ пуд’ пуня’ военной частьхани тэвыв’’, сёбар’’ нини’’ тидхалембаванзь манзаям’ ня’’мадм’. Тедалахана минрев. Харада тарця: хубтахана пыхыдана’’ высылпива’’, яля’ еркана сюрберӈава’’. Нарэй, ӈэрёй призыв ӈэб’’, армиян’ хэванди тохоламбасетыдм’.
Лаханаконями тэри мэвам’ нивэда харвабта’’, едэй серм’ тохолавысь. Нита ӈуди’’, ӈая’ хоб’’ падтамби. Луца вадавна пада «татуировки» нюбета сертаби. Падтаӈго ӈацекы ӈэдаханда теневавы.
Тэри’ нива мэвахаданда пода мер’ миӈа. Теда’ Ростовской область’ няна мэ. Мяканда тованда ӈэсонд’ ӈопой иры хаи. Вадавнанда таняӈы яхана ӈоб’ иба. Таӈэда сие ниць ирыхына пэӈгавы. Та’ ямбан’ мохокабты, ядембадада +60o пирт’ тэворӈа.
Автор: Мария Ӈокэй’ падвы
Авторы
Няръяна Нгэрм
Темы