Няръяна Ӈэрм
Ненэй ненэцяӈгат соявы
Нюртей нина’’ телевизоркана манэ’’янаць. Небо’ нянда округна’’ ӈэвахы ерв мале сян ялян’ мядоманзь турӈась. Харта ӈод’’ ты пэрти’’ поӈгана сава юнда пили’’ со. Мято’ тер’’ ӈобтикы яханандо’ теневыдо’. Тикы нява’’ — Юрий Дмитриевич Вэненго. Хахаяда яля’ мяканда тэворӈадамзь. Мядодо’ пэ’’ тэлхана мяры’’. Сидя ёнар’’ тэдо’ пэ’’ хоё’’ тэлувна нявотарӈа’’. Мани’ лахарёми’ невхы паӈгото’ няд пяминзь.
Время для чтения ~ 4 минуты
— Техэ невхы паӈгава’’ ненэй ненэця’ — Вэнго еркарм’ мэта, «Сэр’’ ӈо», «Неро Яв’ мал» (пролив Малыгина)’ няд ӈэвысь. Тикы ирива’’ пэ’’ терхат нем’ ӈэвта мэвы. Харе’’ яханда ханавэда. Нюнда ӈадиво’’махад ириева’’ яӈгумлахавы. Хадава’’ хасава нюмда ӈани’ пырдари’ яханда тэвравэда. Тикахавад ӈани’ хаюпа хэвакы, нивакы ехэрава’’. Яхананда хасава нюда Вэнго еркарамда мэ’’мы. Мале тальцюна’ няръяна луци’’ мальӈгана еркарава’’ яӈгамдавэдо’ ӈэӈгудо’. Вэненгоӈэ хэвы. Яханана’’ тарця еркарм’ мэта’’ мал’ ӈавнандо’ паӈгодо’ Сэр’’ ӈо’ няд ӈа’’. Тикахат Пэ’’ тэлханана’’ Вэненго еркарм’ мэта хаби’’ ӈадимяць, — тарем’ Юрий Дмитриевич вадамда пядась.
Пыда няхар’’ хасава нюда, мал’ ӈарка ненэця’’. Теда’ общинахана харе’’ тыдо’ пэрӈа’’, ӈахат Юрий Дмитриевич луци’’ ты пэртяӈэ таравысь. Ма’’нисяв, ӈамзана’’ мир’’ сава, харе’’ илеб’’, няд’’ма’’ таня’’. Мат’’ по’ тяхана малко ӈэвадавы’’, тэри нюда табедамби. Пенсиян’ хэ’’мяхаданда тамна ӈоб’’ по’ малкурць нядаӈговы.
Яханандо’ тыдо’ мэкадавна пэрмыдо’. Сидя си’’ив яля’ тэхэ’’нато’ хан’’ӈа’’. Палаткыдо’ хан’’ла’’, тыто’ пумна ядэрӈа’’. Тюку по’ Юрий Дмитриевич ӈобтикы тарем’ ядэрць ӈэвадавы’’. Ӈахат хасава нюху’’ната ядэрпата ӈаварм’ пирембадаӈэ таравы, тэри нядаӈговы. Сидя иры’ ямбан’ пэ’’ тэл’’ помна тыдо’ ядэлэйдо’. Нюрте’’э’ ядембада’ няю’ хан’’ӈа’’, пуна неняӈг’’, пилю’’ ӈадиво’’махад — ӈэрм’ няю’ тыдо’ танабидо’, таняна сырада ӈока. Ӈавкыда илева’ ямбан’ ядэла пэ’’ тэл ӈули’’ сававна теневыда, сэвта хая хось пиръяда. Юрий Вэненго мась:
— Тына’’ пэ’’ тэлрихина нина’’ хадыламбю’’, нядадамдо’ ӈаманзь пэ’’ хой’’ мал’ няку танабина’’, таняна нядэй, тэлхавахана — вэбари’’. Ӈыльняна’ та’ пэрцетына’’. Мале пилю’’ иры’ нябимдей яля’ пуд тэхэна няда ӈораць тара. Хор’’ ирыхына, сыранда ӈэ’ лембя’ пирӈэ хэ’’мяхад пуня’ сюрхалембива’’. Сармик’’ таняб’’, мер’ пясетыва’’, вэба’ иры’ 20 пиркана пуня’ салцетыва’’.
Тюку по’ яноць сыранда холка тянёри суюм’ вадавы’’. Яхадей’’ нисерма’ ёльцяӈгана варӈэ’’, тёня’’, нохо’’ мал’ варемдо’ ӈораць мэ’’ӈа’’. Небой ӈадимы’’ суюдо’ ӈод’’ ӈани’ хаӈгавы’’.
— «Нум» ирива’’ харта тасламбида, ты ӈокадм’ теневада. Етри’ вадёданхавабто’ ява’’ тянюмда, — Вэненго’’ нися тасламбида. — Теда’ ныланабина’’ помна халям’ пэрцетыва’’: туи’’, няръяна халя’’ таня’’. Ӈамана’’ пирувна ӈули’’ ёльць’, тев’ ёльцяӈгана ӈаворць халяри тара, тикахад ӈока минханда ядембадахана вомда.
Хадыта тоход ӈадаравы яха’ сё’’, мята сидя хэвувна хан’’ӈа’’. Тикавна туи’’ тэри халкадарӈа’’. Ненэйвана нара’ няна ӈока’’ ӈэдараха’’. Тарем’ пэ’’ тэлха’’на Вэненго мяд’ тер’’ илева’ тыдо’ вадаба иле’’.
Автор: Марина Яр’ падвы
Авторы
Няръяна Нгэрм
Темы