Няръяна Ӈэрм
Ненэй тюнтавам’ ӈадимдевы’’
Нямэхэна яна’’ ӈэвахана мэна’’ ервава’’ тюку пова’’ Мяд’ тер’’ поӈэ тасладась. Ӈадьбята я’ ханярина ӈопой иланд’ ха’’амвы ненэцие’’ нямна етри’ лахана’’.
Время для чтения ~ 2 минуты
Тандая’ Россияна’’ тиӈгэвна Нядма няби Масне Няруйха’ тюнтавам’ манэ’’ӈаваць. Сидди’ «Первый канал» сер’ ӈадимдець. Ненэй ненэцие’’ тюнтавам’ ваде’’ӈаханзь. Ханзер’’ мэць пэрмамдо’ ӈани’’ яна’’ тиӈгывна иленаха’’ манэ’’лабтамбихинзь.
Нядма няби Масне сидябты сё мэта ненэцяӈг’. Ӈобкана хыноцетыхы’, «Тэмбойм’» нюбе’’ӈаха’. Та’ пилю’’ ирыхына ӈопой мяд’ терӈэ хаяханзь. Тамальӈгана тюнтавамди’ хардахана мэ’’ӈадинзь. Теда’ выӈгана, ненэй мякана мэць таславэдинзь. Сидди’ «Играем свадьбу» проектан’ мэвыць. Нара’ ямбан’ тадтаӈговы’’, ӈока ненэцям’ тикан’ хамы’’. Нядаӈговы ӈани’ ӈока ӈэвы.
Программам’ минренаха’ хурка ембдяр’’ мэць таравам’ хэтӈаханзь. Ӈамгэ’ то’’олха ӈавраха’’на тольм’ пандамба серо’’мам’ ненэцяӈгат хонрамбихинзь. Тюнтавам’ хардахад хахая ӈэда мякана мэ’’мэдонзь. Сямян ила’ саир’’ сер’ ӈэда мэсы манэ’’лабтаць. Проектхана мэвамда Масне ваде’’мэдась:
— Округна’’ тодо’’ тэнз’’ ненэцие’’ сё мэти’’, тарани’’ мякана манзарани’. Ненэй сё мэцетыни’. Хар’’ни’ илани’ саирм’ нерня’ минрени’. Сидни’ тарця серт’ хамамдо’ ёльце саваӈэ тасламинзь. Ӈадьбята маининзь. Тадтаӈго’’мина’’ хайна миӈаць, мэкад’’ иле’’мина’’ ӈани’ таняць. Тикы проектхана мэ’’мами’ пон’ тенеӈгуми’.
Тарця ӈарка серкана мэ’’мади’ яӈгусь. Нюртей мэва’ я’ ӈардавна юнамди’ ӈэдаради’. Тад нерня’ тамна хыноць варемди’ мэтӈаха’. Харвабта ӈамгэхэв концертм’ ӈадимдеӈгодакэхэ’.
Автор: А.Хорэли’ падвы
Авторы
Няръяна Нгэрм
Темы