обновлено: 06:55, 13 июля 2023
Няръяна Ӈэрм
Ненэй вадада -иланда саир’’
Ил’ саць мерета ӈамгэ ӈэвы. Сидя ӈуда’ тарка’ помна пона’’ итрев’ хамдомби’’, ня’’мъито’ яӈгу. Ненэця’ вадыркана ӈод’’ ӈани’ тарця ӈэвы. Ӈацекы’’ — мер’ вадюрӈа’’, илаӈгы ненэця’’- ӈэвдо’ мерри’ яламӈга’’. Ӈоб’’ тарця нява’’ тедалахана помнана’’ ядэрӈа’’. Пыда ненадо соя’’ма яляда ӈась. Сидндет ю’’ самляӈг поданда хаясь.
Время для чтения ~ 4 минуты
Неняӈг’’ иры’ юдимдей яляхана Нейко Максимовна Янгасова 85 поданда хаясь. Харе’’ иламда тарем’ тензибтембида. Ӈавнанда Езынги’ мяд’ терхат соявы. Нисяда луца нюмда хавна Яманам’ нюбе’’мы. Факторияхана луца’ вадам’ тэволанаӈэ таравы. Харта ӈод’’ Яраӈо факториян’ тэв’’махадандо’ янамбовна иландо’ тидхалмы’’. 1942 похона нисядо’ яӈгумы, небяда юкад вата ӈоб’’ нюмда харта вадабавыда. Маӈгаба, маендорць илевы’’, тамальӈгана Нейко тет пода ӈэвы. Ӈамгэ’ пиркана Щучье хардан’ тохолкованзь ханавэдо’. Си’’ив по’ тохолковы, тохолкова’ сер’’ нянанда нензел’’ ӈэвы.
Ленинградхана тохолковы
Падарт’ харбё не ӈацекэӈэ тасла Ленинград март’ ӈэдаравэдо’. Танянанда нюрте’’э школахана тохолковы, пуна педагогической институтан’ пявэда. Тикыда мале’’мяхаданда Катровож хардахана биологиян’, географиян’ ӈацекы тохоламбавы. Тиканда хавна Нейко Максимовна пили’’ ненэй ваданда, техэ паӈганда теневаван’ харвавэда. Манзаянда ирмня ненэцяӈгат лаханако, хобцо, невхы иле’’ми падыбавы. Тикыда ненэй вадан’ тэврамбавыда.
Ӈамгэри манзаям’ пяб’’нанда етри’ инда ядан’ минреда.
Нейко Максимовна Салехардан’ тэв’’махаданда санаторно-лесной школахана няхар’’ по’ ямбан’ манзарани ненэцие’’ ӈамгэ’ мянувна ненэй вадавна лаханако тохолавыда. Пуна ӈацекы тохоламбувандаӈэ тохолкурти’’ училищан’ хэвы. Илебей ненэцие ненэй вадан’ тохоламбавы. Тикахад ненэй ваданда грамматикам’, тамна ӈани вади’’ хара’’ техэ паӈгахаданда тохоламба, тасламба пявыда.
Пыда вадана’’ нямна тарана учебник падвысь. Вадамда иланданда таславэда. Ӈарка манзаянда ирмня Городской Советхана, Окружком’ Советхана мэвысь. 1978 похона тодо яхат товы’’ ӈацекы’’ тохоламбади’’ съездахана лаханавысь. Ханярина мэбта ӈод’’ Ненэй ненэцяӈэ поӈганана’’ юнда пили’’ со. Лаханако’’, ярабц’’, ненэй вадам’, ё’’ нюби пыда ӈотаӈод’’ сертаӈгуда.
Мань сяхаринда Нейко Максимовна Янгасовам’ манэ’’пани етри’ тосасетыдм’. Няни ма’’мандарха ӈэсеты, вэнзерарка’’ падвэр, несэйвана хэтбат тарась. Тэри мунзипой’’ сяхаӈгарт’ ядувнани ни хэсету’’. Пили’’ ваде’’мандада, хэтувандада танясеты. Вадида етри’ ненэй вадана’’ нямна ӈэсеты’’.
Ӈарка со’’яма’ ялянда ед’ маня’’ ненэй ненэцяӈэ сейхад ӈэда вади ӈэдарамбива’’. Тамна пон’ сидна’’ тохоламбая, табадамбая! Нейко Максимовна, сензан’ ӈа’’!
Марина Яр’ падвы
