Няръяна Ӈэрм
Талереӈгавы ненэця’ ваде’’мы сер’’
Илева’ тяхад ненэй ненэця’’ хуркари’’ иле’’ми вадецеты’’. Хальмераха’’, хэбидя ё’’ ерваха’’ талереӈгами’’ нямна ӈэсеты’’. Тарця серо’’ нямна ӈэда’’ лахарё’’ сидя хани’ син’ сяни’’ ненэцяӈгат намдвэми ӈока. Тикыни’’ янамбовна падыбасетын, теда’ мале ӈармани сер’ харто’ ӈэсондо’ ихини ха’’амсетыд’’. Намдормыни’’ — ненэцие’’ иле’’ми’’ хавна тамна лаханако’’, хальмер’’ ян’ тэворо’’ма’’, талереӈгавы’’ ненэця’’ вадета’’.
Время для чтения ~ 3 минуты
Ненэй ненэця’’ лахарёхо’’на техэ саирканда илма’’ няхар’’ нинар’’мана миӈа. Ӈэвана’’ ниня «Нум» хасава иле, сянди’’ явна ядэрта ӈамгэм’ таняд мание, илам’ тасламби. Сямян илена’’ ӈамгэ’’ — я’ сармик’’, икна илена ӈамгэ’’, тиртя сармик’’, явна маирта’’, ненэця’’ ӈэдакы’’ «Нум» табедавы иландо’ нёда нерня’ миӈа’’. Няби ня’ ханта’’, яӈгуворта’’ ненэця’’ я’ мидхы лахарёхона я’ ӈыл’ ханӈа’’, сидряӈгадо’ ӈопой я’ тир’ ни’ тэворӈа’’, талирӈэ илена’’ ненэця’’ сэван’ ӈадиворӈа’’.
Яӈгумы ненэця’’ я’ ӈылна илена «Ӈа» вэсаком’ ерво’’ӈа’’, пыда таняна сямян серо тасламби. Таняӈы яханандо’ ӈоб’ тарем’ сидна’’ тотрев’ иле’’. Ӈэдалёрӈа’’, мюсерӈа’’, хане’’. Пыдо’ иле хаёвы’’ нидо’ яӈгумэӈэ ваде’’ядо’. «Ӈа» вэсако хабцяӈо я’ тир’ ни’ ӈэдабтамби. Пыда пилипон’ ӈаворман’ харва, тикы’ е’’эмня хуркари’’ хабця’’ ӈадьбато’ я’ тир’ ни’ ӈадиворӈа’’. Невхы лахарёхона я’ ӈыл’ хэвы’’ ненэцие’’ сидряӈг, таллир ӈэдабтамби. Тикаӈэ пим’ ялэ’’ӈа’’, ӈадьбято’ талирӈэ хальмер’’ сидряӈг’’ ненэцие’’ сэван’ пи’ ӈадиберӈа’’.
Танянандо’ иленаӈэ сидна’’ хабэйӈэ толаби’’. Сянхана тамна илена’’ нидо’ сянзь ярӈа’’, иле хаёвыдо’ мерку няндо’, поӈгато’ тэвраван’ харвэйдо’. Ӈадьбято’ илева’ тяхад ненэй ненэця’’ хальмерахато’ хэли’’ вуни’’ ядэр’’, халмер’’ хэван’ хунахарт вуни’’ ӈэсод’’. Невхы ва’’алкана хальмер’’ ӈацекы’’ пи’ сянакурӈа’’, едейкурӈа’’, хуримна сюрамба ядэрӈа’’, илена’’ ӈацекэхэт нядамдо’ пюрӈа’’. Пэвсюмя’ няна пон’ еня’’ ӈацекы манэ’’пато’ сянхана маямбаӈгу’’, сянакода’’ ӈацекы’’ сэвха’’ сидряӈгадо’ янамбовна ӈадимда’’.
Хурина манзеты’’ — талерена ненэця’ тэри ӈамгэхэв тидрахам’ манэ’’сарӈа, муно намдорӈа, лаханакодараха’’ ненэцие’’ вабц намдорӈа. Талеро сэван’ савовна манэ’’мы’’ ненэцие’’ вадавна, хавы’’ ненэцие’’ сидряӈг’’ тибей’’, ӈадсуй’’ паны мэ’’ӈа’’, сядодо’ тахабэй’’, медсуйраха’’.
Пихина сянакома’ яхана ӈамгэхэв’’ сянако манэ’’пато’ сянхана талир маяӈгу’’ни’’им’’, минхандо’ мэ’’лаӈгудо’, сянако мяд’ мюня тамна хонёда’’. Талеревы ненэць’ янамбовна инда ӈудм’ ёта, тамна хансосяламзь пиртада. Манзеты’’ — хальмер’ сидряӈг пилипон’ нёдаӈгудо’, тарць’’ ӈэсоӈгана ет’ няндо’ сюртеӈгудо’.
Мань ӈацекы ӈэвани маляӈгана ӈоб’’ иле’’мям’ намдадамзь. Сянако ня’’мы няни Суӈоси Яр’ талере’’мя. Ӈарка ненэцяӈэ хэ’’мяхартахаданда талере’’мамда юра я’’мадась, пили’’ ибецетыда. Ваде’’мыда серото’ сер’ падынась. Хацявысь исялав’’, ӈаркавна хаӈгула’’махаданда ӈэвамда етри’ едевысь, сэвхата ӈамгэхэби етри’ манэ’’сармысь. Ӈавэдана нисяда хабей’’ тадебям’, Пеё Салиндерм’ тэвравысь, тикар ӈоб’’ яӈорэй’ самбдоро’’махаданда савумдадась.
Автор: Раиса Яптунэ
Авторы
Няръяна Нгэрм
Темы